पलिस्थाया स्वीन्याक्वःगु साहित्यिक ज्याझ्वः

यल – नेपालभाषाया साहित्यिक संस्था पलिस्थाया ग्वसालय् स्वीन्याक्वःगु साहित्यिक ज्याझ्वः ‘पलिस्था चिनाखँ मुँज्या–११३९’वंगु शनिवाः जुल । थनया क्वपुंद्वँय् च्वंगु सातोआकी भवनय् जूगु ज्याझ्वः साहित्यकारलिसें समालोचक पूर्ण ताम्राकारया सभापतित्वय् जूगु खः ।

वाङ्मय शताब्दीपुरुष सत्यमोहन जोशी मूपाहां जुयादीगु ज्याझ्वलय् नेपालभाषा एकेदेमिया चान्सलर चित्तरञ्जन नेपाली विशेष पाहांकथं झायादीगु खः । चिनाखँ मुँज्याय् डा. योगेन्द्र प्रधान, त्रिरत्न शाक्य, प्रतिसरा साय्मि, प्रा. नर्मदेश्वर प्रधान, श्रीराम श्रेष्ठ, नारद वज्राचार्य, शाक्य सुरेन, सुशील राजोपाध्याय, बद्री वेदना लगायतं चिनाखँ पाठ यानादीगु खः ।

उगु हे ज्याझ्वलय् साहित्यकार डा. पुष्पराज राजकर्णिकारया नियात्रा सफू ‘यः दाइ’या मूपाहां व विशेष पाहां नं पितब्वज्या यानादीगु खःसा उगु सफूयात कयाः समालोचक प्रा. प्रेमशान्ति तुलाधरं समीक्षा यानादीगु खः । अथे हे ज्याझ्वलय् वाचन याःगु चिनाखँयात कयाः डा. राजकर्णिकारं समीक्षा यानादीगु खः ।

ज्याझ्वलय् मूपाहां जोशी, विशेष पाहां चित्तरञ्जन नेपाली, सफूया च्वमि, डा. राजकर्णिकार लगायतया वक्तातय्सं थःथःगु नुगःखँ तयादीगु खः ।