करं यानाः इन्टरनेट थिके जुइगु

येँ – कम्प्यूटर एशोसियसन अफ नेपाल (क्यान) महासंघ व इन्टरनेट सेवा प्रदायक संघ (आइस्पानं) सरकारं इन्टरनेटय् दूरसंचार सेवा शुल्क तःगुयात लित कायेत माग याःगु दु । निगुलिं संस्थां मंकाः पत्रकार सम्मेलन यासें आर्थिक दँ २०७५÷७६या बजेटपाखें इन्टरनेट सेवाय् दूरसंचार सेवा शुल्क कायेगु निर्णय याःगु सरकारया हे घोषित ब्रोडब्यान्ड नीति विरुद्ध जूगु खँ धाःगु दु ।

क्यान महासंघया अध्यक्ष हेमन्त चौरसियां राष्ट्रिय ब्रोडब्यान्ड नीतिइ ब्रोडब्यान्ड सेवा सहज व सुलभ यायेत अन्तर्राष्ट्रिय सञ्जाल तक पहुँच वृद्धि यायेगु धाःसां सरकारं करया भार क्वबिइकाः सर्वसाधारणयात इन्टरनेटया पहुँचपाखें तापाकूगु खँ धाःगु दु । नेपालीतय् क्रय शक्ति म्हो जूगुलिं अझ नं इन्टरनेट सर्वसाधारणया पहुँचय् थ्यनामच्वंगु अवस्थाय् सेवाशुल्क थप यानाः सर्वसाधारणयात झन् इन्टरनेटपाखें तापाकूगु खँ धाःगु दु ।

अथेहे आइस्पानया अध्यक्ष दिलिप अग्रवालं सरकारं घोषणा याःगु दूरसंचार सेवा शुल्कं इन्टरनेट विस्तारय् पंगः थनीगु खँ धयादीगु दु । आः थपे जूगु कर उपभोक्तापाखें हे उठे याइगु जूगुलिं थुकिं उपभोक्तायात तःधंगु मार लाइगु व इन्टरनेट थिके जुइगु खँ पत्रकार सम्मेलनय् धाःगु खः ।

सरकारं इन्टरनेटय् थ्वयां न्ह्यः ग्रामिण दूरसंचार कोष शुल्क २ प्रतिशत, रोयल्टी ४ प्रतिशत, फाइबरय् भन्सार १५ प्रतिशत, व्यान्डविथय् टिडिएस १० प्रतिशत व भ्याट १३ प्रतिशत यानाः ४४ प्रतिशत कर कयाच्वंगु खःसा आः थप याःगु सेवा कर लिपा इन्टरनेटय् कर जक ५७ प्रतिशत थ्यनीगु खँ धाःगु दु ।