संघीय संसदया अधिवेशनया तयारी

नेपाःया न्हूगु संविधानकथं जूगु निर्वाचनलिपा थ्व हे वइगु फागुन २१ गते सोमवाः सनिलया ४ ताः इलय् संघीय संसदया न्हापांगु ऐतिहासिक अधिवेशन च्वनेत्यंगु दु । उकुन्हु प्रतिनिधिसभा व राष्ट्रियसभा निगुलिं सदनया बैठक च्वनी । संघीय संसदया न्हापांगु ऐतिहासिक बैठकया निंतिं सकतांकथंया तयारी नं क्वचायेधुंकूगु दु ।

निक्वःगु संविधानसभापाखें निर्माण जूगु न्हूगु संविधानकथं क्वचाःगु प्रतिनिधिसभा व राष्ट्रियसभा सदस्य निर्वाचन लिपा च्वनेत्यंगु निगुलिं सदनया न्हापांगु अधिवेशन अन्तर्गत न्हापांगु अलग अलग बैठक थ्व स्वयां नह्यःप् संविधानसभाया बैठकस्थल जुयाच्वंगु न्हू बानेश्वरय् च्वंगु अन्तर्राष्ट्रिय सम्मेलन केन्द्रय् च्वनेत्यंगु दु ।

राष्ट्रपति विद्यादेवी भण्डारीं थ्व हे फागुन ८ गते प्रधानमन्त्री केपी शर्मा ओलीया सिफारिसय् नेपाःया संविधानया धारा ९३ (१०) कथं आह्वान यानादीकथं निगुलिं सदनया बैठक च्वनेत्यंगु खः ।

संघीय संसद सचिवालयया महासचिव मनोहरप्रसाद भट्टराईं निगुलिं सदनया सपथ व न्हापांगु बैठकया तयारीइ थःपिं लगे जुयाच्वनागु जानकारी बियादिल । प्रतिनिधिसभाय् २७५ व राष्ट्रियसभाय् ५९ सदस्य दु । थ्व निगुलिं सदनया मंकारुपयात संघीय सदन धाइगु खः । प्रत्यक्ष निर्वाचन प्रणालीपाखें निर्वाचित १६५ व समानुपातिक निर्वाचन प्रणालीपाखें ११० सदस्य दुगु प्रतिनिधिसभा संघीय संसदया क्वय्या सदनकथं काइ । वंगु मंसिरि १० व २१ गते निगू चरणय् यानाः प्रतिनिधिसभा व वंगु माघ २४ गते राष्ट्रियसभा सदस्यया निंतिं निर्वाचन जूगु खः ।

राष्ट्रपतिपाखें ज्याथम्ह सदस्ययात सपथ
संघीय संसदया नवनिर्वाचित सदस्यया न्हापांगु बैठक स्वयां छन्हु न्ह्यः फागुन २० गते सपथ ग्रहणया ज्याझ्वः जुइ न्ह्यः निगुलिं सदनया ज्याथम्ह सदस्यं राष्ट्रपतिपाखें शीतल निवासय् सपथ काइगु ज्याझ्वः दु । प्रतिनिधिसभा सदस्यं सनिलया ४ व राष्ट्रियसभाया सदस्यं सनिलया ५ ताः इलय् पद व गोपनीयताया सपथ काइगु ज्याझ्वः दु । वय्कःपिंसं सम्बन्धित सदनया सांसदयात सपथ ग्रहण याकाी । प्रतिनिधिसभाया सभामुख व राष्ट्रियसभाया अध्यक्षया निर्वाचन मजूतले वय्कःपिंसं हे बैठकया अध्यक्षता यानादी ।

प्रतिनिधिसभाय् राष्ट्रिय जनता पार्टीपाखें सर्लाही क्षेत्र नं २ पाखें निर्वाचत जुयादीम्ह महेन्द्र राय याद (८०) व राष्ट्रियसभाय् नेपाली कांग्रेसया तारादेवी भट्ट ज्येष्ठ सदस्य जुयादी । राष्ट्रियसभाय् सरकारया सिफारिसय् राष्ट्रपतिपाखें मनोनित जुयादीपिं डा. युवराज खतिवडा, रामनारायण बिडारी व डा. बिमला पौडेलयात सर्वोच्च अदालतं तत्कालया निंतिं सपथ दिकेत वंगु फागुन १३ गते अन्तरिम आदेश जारी याःगुलिं वय्कःपिनिगु सपथ धाःसा मजुइगु जूगु दु ।

थ्व स्वयां न्ह्यःया सरकारं मनोनयन याःपिंत लित सःताः सरकारया सिफारिसय् न्हूपिं सदस्य मनोनयन याःगु विषयय् सर्वोच्चय् रिट निवेदन लाःगु खः । उखे फौजदारी मुद्दा लानाच्वंम्ह प्रतिनिधिसभा सदस्य रेशम चौधरी व किर्ते प्रकरणय् छानविनय् लानाच्वंम्ह नवराज सिलवालया सम्बन्धय् छुं नं निकायपाखें लिखित रुपं छुं नं जानकारी मवःगुलिं वय्कःपिं वल धाःसा सपथ काये फइगु संघीय संसद सचिवालयया प्रवक्ता डा. भरतराज गौतमं कनादिल । फागुन २० गते सम्बन्धित सदनया बैठक कक्षय् प्रतिनिसभा सदस्य व राष्ट्रियसभा सदस्यं सपथ ग्रहण याइ ।

थारुनिसें हिन्दी भासं सपथ
संवैधानिक व्यवस्थाकथं थःथःगु मांभासं सपथ काये इच्छुक सदस्यं उगु भाषाबारे जानकारी बीगु क्रम जारी दुसा थौंतकया दुने जानकारी बीमाः । संघीय संसदया सदस्य अनिलकुमार झानं हिन्दी, प्रदीप यादव व हरिनारायणप्रसाद रौनियारं भोजपुरी, मोहम्मद इस्तियाक राईं अवधि, शान्ता चौधरी व गंगा चौधरी सत्गवां थारु व राजेन्द्र श्रेष्ठं नेपालभाषां सपथ काइगु जूगु दु ।

सुं नं सदस्यं थःगु मांभासं सपथ काये इच्छा जूसा उम्ह सदस्यं सपथया व्यहोरा थःगु मांभासं अनुवाद यानाः उगु अनुवादया प्रतिसहित स्वन्हु न्ह्यःहे संघीय संसदया महासचिवयात उपलब्ध याकेमाःगु कानुनी प्रावधान दु ।

सभामुख–अध्यक्षया निर्वाचन
संविधानय् संघीय संसदया न्हापांगु बैठक च्वंगु बाःछिया दुने प्रतिनिधिसभाया सभामुख व उपसभामुख अथे हे राष्ट्रियसभाया अध्यक्ष व उपाध्यक्षया निर्वाचन याये सिधयेकेमाःगु व्यवस्था दु । सभामुख व उपसभामुख अथे हे अध्यक्ष व उपाध्यक्ष फरक दल व फरक लिंगया जुइमाःगु प्रावधान दु । निगू दलया समर्थनय् प्रधानमन्त्री नियुक्त जूगुलिं नियुक्तिया ३० न्हु दुने अर्थात वइगु चैत ३ गते दुने प्रधानमन्त्रीं प्रतिनिधिसभाय् विश्वासया मत काये माःगु संवैधानिक व्यवस्था दु । उकिया निंतिं नं सचिवालयं आवश्यक तयारी यानाच्वनागु प्रवक्ता गौतमं कनादिल ।

व्यवस्थापनय् स्वंगूत्या करोड
सचिवालयं निगुलिं सदनया सभाकक्ष निर्माण, माइक व्यवस्थापन व मर्मतया निंतिं स्वंगू करोड न्यय्गू लाख बजेट प्राप्त याःगु दु । सचिवालयं थनिं दछि न्ह्यः हे अध्ययन यानाः अर्थ मन्त्रालययात माग याःकथं उगु बजेट निकासा याःगु खः ।