विपश्यना ध्यान सम्बन्धी वृहत प्रवचन

यल- धर्मोदय सभा, युवक बौद्ध मण्डल नेपाल व धर्मकीर्ति विहारं थनया जावलाख्यलय् विपश्यना ध्यान सम्बन्धी वृहत प्रवचन ज्याझ्वःया ग्वसाः ग्वल । ज्याझ्वलय् ध्यान गुरुलिसें भिक्षु प्रज्ञाश्रीं विपश्यना ध्यानया बारे प्रवचन बियाबिज्याःगु खः ।

ज्याझ्वलय् वसपोलं विश्वय् शान्ति, मैत्रीयुक्त वातावरणया निंतिं विपश्यना ध्यान अतिकं आवश्यक व महत्वपूर्ण जूगु खँ धयाबिज्यात । जीवनय् मानसिक दुःख व दुःखया कारणयात थुइकाः दुःख निवारण यायेत विपश्यना ध्यानया अभ्यास यायेमाःगु खँय् वसपोलं बः बियाज्यात । ‘विपश्यना ध्यान यायेगु धइगु छुं गुगुं सम्प्रदायया कर्मकान्डी मखसे थम्हं थःत थुइकेगु विधि खः । थुकिं मनया विकारयात निष्प्रभावी याना यंकाः शान्त व सुखया अनुभूति याये फइ’ वसपोलं धयाबिज्यात ।

युवक बौद्ध मण्डलया अध्यक्ष अरणीतारा वज्राचार्यं देशय् दिगो शान्ति, करुणावान व मैत्री जाःगु व्यक्तित्व निर्माणय् बुद्धया ज्ञान व ध्यानया महत्व दुगु चर्चा यानादिल । बुद्धया उपदेश गुगुं धर्म विशेष स्वयां नं वर्तमान जीवनयात सुखपूर्वक छ्यायेगु जीवन पद्धति जूगु अध्यक्ष वज्राचार्यं धयादिल ।

प्रवचन ज्याझ्वलय् नेपाली मूलया करिब सछिम्ह म्यानमारया नागरिकलिसें द्वःछिं मल्याक मनूतय् उपस्थिति दुगु खः । उगु पुचलं लुम्बिनी व बुटवलय् नं उकथंया हे ध्यान शिविर यायेगु ज्याझ्वः दुगु जानकारी नं बिउगु खः ।

सम्बन्धित बुखँ

LEAVE YOUR COMMENTS