चचाप्याखं सम्बन्धी कार्यशाला गोष्ठि क्वचाल
यल – नृत्य निर्देशक संघ नेपाल यल कचाया ग्वसालय् जूगु चचाप्याखं सम्बन्धी कार्यशाला गोष्ठि क्वचाल । वंगु बैशाख २ गते निसें न्ह्याःगु गोष्ठि न्यान्हुतक न्ह्याःगु खः । समापन ज्याझ्वलय् नवासें चर्चाप्याखंया प्रशिक्षक नापं गोष्ठि प्रमुख स्रोत व्यक्ति प्रज्वलरत्न वज्राचार्यं प्याखं हुलीपिं कलाकारतय्सं चचाप्याखंलिसें हरेक प्याखंया हाउभाउ कण्ठ यानाः प्याखं हुलेगु जक मखसे उकिया अर्थयात नं ध्वाथुइका थुइका कायेमाः धयादिल ।
‘चचाप्याखं धइगु मेमेगु साधारण प्याखं थें मखु, थ्व जीवन दर्शन नं खः’, वय्कःया धापू दु । चचाप्याखय् ल्हाःया मुद्राया अर्थयात नं थुइकाः प्याखं हुलेगु यात धाःसा उकिं स्वस्थ जीवनया शिक्षा समाजयात नं बीफइगु वय्कलं धयादिल । अथे हे संघया केन्द्रीय न्वकु संजय शर्मा राजोपाध्यायं सनातन हिन्दू समाज दुने नं चर्चाप्याखंया पुनर्जागरण हयेमाःगु खँय् बः बियादिल । न्हापा न्हापा हिन्दू समुदाय दुने नं चचाप्याखंया प्रचलन दुगु खःसां लिपा वयाः लोप जुया वंगु वय्कलं धयादिल ।
हिन्दू समाज दुने चचाप्याखंया पुनर्जागरण हयेत राजोपाध्याय समुदाय जक मखसे जोशी व कर्माचार्य समुदायं नं चिउताः क्यनेमाःगु व सक्रिय जुइमाःगु वय्कलं धयादिल । ज्याझ्वलय् अक्षयश्वर महाविहार संरक्षण समितिया नायः राजेश शाक्य व यल महानगरपालिका वडा नं. १६ या वडाअध्यक्ष निर्मलरत्न शाक्यं नं कला व कलाकारिताया ख्यःया समग्र विकासया निंतिं थःपिंसं फूचाःकथंया ग्वाहालि यायेगु प्रतिवद्धता प्वंकादीगु खः ।
गोष्ठिइ सहभागि जुयादीपिंत वडाअध्यक्ष शाक्यं दसिपौ लःल्हानादीगु खःसा संघया केन्द्रीय नायः भुवनदास श्रेष्ठं अक्षयश्वर महाविहार व गोष्ठिया मुख्य स्रोत व्यक्ति वज्राचार्ययात सुभाय् पौ लःल्हानादीगु खः ।मुक्कं नीन्हय्म्हेसिया ब्वति दुगु गोष्ठिइ मुख्य प्रशिक्षक वज्राचार्यं चचाप्याखं व उकिया थीथी मुद्राय सैद्धान्तिक व व्यवहारिक पक्षयात कयाः प्रशिक्षण बियादीगु खः । ज्याझ्वलय् रीता व्यञ्जनकारं चचाप्याखं न्ह्यब्वयादीगु खः ।
LEAVE YOUR COMMENTS