रेशम चौधरीयात राष्ट्रपतिं मबिल आम माफी
येँ (नेपालभाषा टाइम्स)÷ कैलाली टिकापुर घटनाय् दोषी ठहर जूम्ह पुलांम्ह सांसद रेशम चौधरीया सजाय माफी याकेत इनाप यासें राष्ट्रपति कायालयय् छ्वःगु निवेदनया फाइलयात म्हिगः राष्ट्रपति कार्यालयं राय सहित गृह मन्त्रालयय् लित छ्वया बिउगु दु ।
राष्ट्रपतिया प्रेस संयोजक खिला कार्कीं राष्ट्रपति कार्यालयं गृहपाखें वःगु निवेदनया फाइल अध्ययन लिपा कार्यार्थ हाकनं गृह मन्त्रालययात हे लित छ्वःगु जानकारी बियादीगु दु । राष्ट्रपति कार्यालयं थ्व ज्या ‘कानुन कथं या’ धकाः राय बिउगु खः ।
राष्ट्रपति कार्यालयं बिउगु रायय् धयातःगु दु, ‘चौधरीयात आममाफीया विषयस प्रचलित कानुन, उगु मुद्दा सम्बन्धी सर्वोच्च अदालतया फैसला, अदालतं प्रतिपादन याःगु सिद्धान्त अःखः मजुइ कथं कानुन कथं या ।’
चौधरीयात बियातःगु मुद्दा लित कायेगु लागिं सत्ता गठबन्धनं तःक्वःमछि सहमति यायेधुंकूगु दुसा लिपांगु खुसी सर्वोच्च अदालतं तकं जिल्ला व उच्च अदालतं यानातःगु सजाय सम्बन्धी फैसलायात सदर यायेवं आः राष्ट्रपति मार्फत सजाय माफी बीगु प्रक्रिया न्ह्यःने न्ह्याकूगु खः । चौधरीया निवेदन राष्ट्रपति कार्यालयय् थ्यं कुन्हु हे प्रधानमन्त्री पुष्पकमल दाहालं राष्ट्रपति रामचन्द्र पौडेलयात नापलानाः थुकिया बारे सहलह ब्याकादीगु खः ।
थ्वहे झ्वलय् चौधरीया सजाय माफी सम्बन्धी निवेदन राष्ट्रपति कार्यालयय् थ्यंगु इलय् टिकापुर घटनाय् मदुम्ह प्रहरी निरीक्षक केशव बोहराया कलाः शारदा बोहरां चौधरीयात माफी मबीत माग यासें निवेदन बिउगु दु । उगु निवेदन नं राष्ट्रपति कार्यालयं कार्यार्थया नितिं धकाः गृह मन्त्रालयय् छ्वया बिउगु दु ।
LEAVE YOUR COMMENTS