थिमियात जीवित संग्रहालय दयेकेत अध्ययन

येँ- सरकारं स्वनिगःया ऐतिहासिक, सांस्कृतिक सहर ख्वपया थिमि लागायात केन्द्रीत यानाः संग्रहालय दयेकीगु जूगु दु । उकिया निंतिं ख्वपया निगू नगरपालिकाया सम्भाव्यता अध्ययन नं शुरु याःगु दु । संस्कृति, पर्यटन व नागरिक उड्डयन मन्त्रालयं ख्वपया मध्यपुर थिमि व सूर्यविनायक नगरपालिकायात जीवित संग्रहालय दयेकेगु ल्याखं पर्यटकीय क्षेत्रया सम्भाव्यता अध्ययन शुरु याःगु खः । मन्त्रालयया सचिव कृष्णप्रसाद देवकोटाया नेतृत्वय् नेपाल पर्यटन बोर्डया कार्यकारी अधिकृत दीपकराज जोशी, प्रदेश नं ३या प्रदेशसभा सदस्य राजेन्द्रमान श्रेष्ठसहितया छगू पुचलं ख्वप देय् दुनेया निगू नगरपालिकायात सांस्कृतिक सहरया रुपय् विकास यानाः पर्यटन प्रवद्र्धन यायेगु लक्ष्यं सम्भाव्यता अध्ययन न्ह्याकूगु खः ।

उगु पुचलं सम्भाव्यता अध्ययनया झ्वलय् मध्यपुर थिमिया थीथी सांस्कृतिक झाँकी, बोडेया नीलबहाराही देगःया परिसर, थिमिया लाय्कू लागा, थिमिया पोटरी स्क्वायर लगायतया थासय् अवलोकन याःगु खः । अथे हे सूर्यविनायक नगरपालिकाया रानीकोट दरवार, अनन्तलिंगेश्वर, डोलेश्वर, आशापुरी देगः जःखःया लागा अध्ययन व अवलोकन याःगु खः । निगुलिं नगरपालिकाया ऐतिहासिक, धार्मिक व सांस्कृतिक सम्पदालिसें प्राकृतिकस्थलया संरक्षण, संवद्र्धन व प्रवद्र्धन यानाः उकियात अन्तर्राष्ट्रियस्तरय् हे पर्यटन प्रवद्र्धन यासें समृद्ध नगरपालिका दयेके फइगु मन्त्रालयं न्ह्यथंगु दु ।