येँ मनपाया महानगरवासीया निंतिं हेमोडायलोसिस सेवा शुरु
येँ – येँ महानगरपालिकां महानगरवासीयात बीगु हेमोडायलोसिस सेवा औपचारिक रुपय् शुरु जूगु दु । येँ महानगरपालिका व नेपाली सेना दथुइ येँ महानगरवासीयात स्वास्थ्य सेवा प्रवाह यायेगु ल्याखं दछि न्ह्यः जूगु सम्झौताकथं उगु सेवा प्रवाह याःगु खः । येँ महानगरपालिकाया प्रमुख विद्यासुन्दर शाक्य छाउनीइ च्वंगु विरेन्द्र अस्पताल झायाः औपचारिक रुपय् हेमोडायलोसिस सेवा प्रवाहया शुरुवात यानादीगु खः । येँ मनपा व नेपाली सेना दथुइ थनिं लछि न्ह्यः महानगरवासीयात स्वास्थ्य सेवा प्रवाह यायेगु सम्बन्धय् सम्झौता पती ल्हाःचिं तयेगु ज्या जूगु खः ।
येँ मनपा प्रमुख शाक्य छाउनी अस्पतालय् वनाः अन वासः याकाच्वंम्ह येँ मनपा १५ वडा दल्लुया चन्द्रदेवी महर्जन (६२दँ)ंया डायलोसिस यायेत तयातःगु उपकरण संचालन यानाः सेवा प्रवाह यानादीगु खः । येँ मनपां महानगरया स्वबासी सर्वसाधारणया स्वास्थ्य उपचारय् पहुँच सहज यायेगु उद्देश्यं स्वास्थ्य क्षेत्रय् ग्वाहालि याना वयाच्वंगु दु । महानगरपालिकां नेपाली सेनालिसे लछि न्ह्यः पुस २ गते
महानगरवासीयात हेमोडायलोसिस सेवाया निंतिं आवश्यक उपकरण, पूर्वाधार व जनशक्तिया निंतिं स्वंगू करोडतका ग्वाहालिया सम्झौता याःगु खः । येँ मनपा प्रमुख शाक्यं सेवा शुरु यासें मनपां महानगरवासीया स्वास्थ्य सेवाया निंतिं ग्वाहालि यायेखंगुलिं लसतां जाःगु खँ कनादिल । महानगरपालिकां विकास, निर्माण, भौतिक पूर्वाधार, व सम्पदाया क्षेत्रय् जक मखसे मानवीय सेवाया ज्याय् नं उतिकं चिउताः तयाः थुकथंया ग्वाहालियात निरन्तरता बिया वनेगु स्पष्ट यानादिल ।
ल्वचं कयेधुंकाः जक वासः यायेगु मखसे ल्वचं कये न्ह्यः हे याइगु स्वास्थ्य सेवाया निंतिं ग्वाहालि यायेत मनपा न्ह्याबलें तयार हे दु धासें वय्कलं अस्पतालपाखें गरिब, निमुखा व असहाय जनतां सरल रुपय् सेवा प्राप्त याये फइगु वातावरण दयेकेत सकसितं इनाप यासें थप ग्वाहालि आवश्यक जूसां नं ग्वाहालिया निंतिं मनपा तयार दु धयादिल ।
येँ मनपा व नेपाली सेना दथुइ जूगु सम्झौताकथं नेपाली सेनाया वीरेन्द्र अस्पताल छाउनीइ उपलब्ध स्रोत व साधनपाखें न्हापांगु चरणय् प्यम्हेसित थुगु सेवा बीगु व लिपा आवश्यक जनशक्ति व उपकरण थप यानाः झिंनिम्हेसिततक सेवा बीगु अस्पतालं जानकारी बिउगु दु । थुगु सेवा कायेगु निंतिं येँ महानगरवासीं येँ महानगरपालिका सहरी स्वास्थ्य महाशाखापाखें सिफारिस कायेमाः ।
सर्वसाधारणया स्वास्थ्यय् सहज पुहँत दयेमा धइगु ल्याखं स्वास्थ्यय् नं थुकथं ग्वाहालि याना वयाच्वंगु येँ मनपां छुं दिं न्ह्यः जक कान्ति बाल अस्पतालयात अक्सिजन आपूर्ति व उत्पादनया निंतिं अक्सिजन प्लान्ट जडान यायेत निगू करोड तका बीगु सम्झौता याःगु खःसा थ्व स्वयां न्ह्यः एम्बुलेन्स सेवाया निंतिं नं सहकार्य याःगु खः ।
LEAVE YOUR COMMENTS