डलरया भाः थहां वनाः नेपाःयात छु लिच्वःलाइ ?

येँ- अमेरिकी डलरया भाः थिके जुयाः आः तकया हे दकलय् उच्च विन्दुइ थ्यंगु दु । म्हिगः एक अमेरिकी डलर खरिदया लागि आज १३० रुपैयाँ ३० पैसा पुले माःगु खः । अथे हे बिक्री दर १३० रुपैयाँ ९० पैसा थ्यंगु खः ।

अमेरिकी डलरया भाः लगातार थहां वनाः न्हूगु बिन्दुइ थ्यंगुलिं आः थुकिं देय्या अर्थतन्त्रया फुक्क हे ख्यः प्रभावित जुइ फइगु खँ धाःगु दु । आयातमुखी अर्थतन्त्र दुगु नेपालय् डलरया भाः थहां वनेवं थुकिं बजाःभाः थकाइगु लिसें जनजीवन प्रभावित यायेफु ।

नेपाली ध्यबा भारतीय ध्यबालिसे स्थिर विनिमय दरय् लानाच्वंगु दु । अमेरिकी डलरया तुलनाय् भारतीय ध्यबा कुहां वनेवं नेपाःया ध्यबाय् नं उकिया लिच्वः लाःगु खः ।

रसिया व युक्रेन युद्धया कारणं संसारभरया हे अर्थतन्त्रय् चाप लाःगु लिसें अमेरिकाया फेडरल रिजर्भ बैंकं न्ह्यःने हःगु नीतिया कारणं नं विश्वरभर हे डलर बल्लाना वंगु खः । अर्थशास्त्री डा. चन्द्रमणि अधिकारीयाकथं अमेरिकी डलर थिके जुया वंगुलिं देय्या अर्थतन्त्रय् नकारात्मक लिच्वः

लाकी ।
नेपाः आयातमुखी अर्थतन्त्रय् आधारित देश जूगु कारणं नं डलरया भाः थहां वनेवं सामान आयातय् यक्व ध्यबा पुले मालीगु अवस्था वःगु दु । निर्यातया मात्रा यदि ३० प्रतिशत स्वयां अप्वः दुगु खःसा डलरया भाः थहां वनीबलय् उकिया लिच्वः सकारात्मक जुइगु खः । तर नेपाःया अवस्था अथे मजूगुलिं समस्या ब्वलंकीगु बिचाः डा. अधिकारीं तयादी । वय्कःया कथं आः रेमिटेन्स दुहां वइगुली छुं सकारात्मक लिच्वः लाःसां पेट्रोलियम पदार्थया आयात नापं थीथी परियोजनाय् पुले माःगु खर्च अप्वइगु खनेदु । थ्व फुक्कया भुक्तानी डलरं जुइगु जूगुलिं भाः थहां वनीगु खः । नखःचखःबलय् विदेशं रेमिटेन्स दुहां वइगु अप्वः जुइ । रेमिटेन्स छ्वइपिंत धाःसा थुकी फाइदा याइ । (रासस)