गबलय् वइगु जुइ सर्वोच्चया फैसला ?

येँ – प्रधानमन्त्री केपी शर्मा ओलीं प्रतिनिधि– सभा विघटन याःगु विरुद्ध सर्वोच्च अदालतय् लाःगु मुद्दाया फैसला वइगु फागुन महिनाया दथुपाखे वयेफुगु खँ धाःगु दु । प्रतिनिधिसभा विघटन विरुद्ध मुद्दाय् बहस यानाच्वंम्ह अधिवक्ता ओम प्रकाश अर्यालं नं फागुन १० गते तकया दुने फैसला वयेमाःगु खँ धयादगिु दु ।

प्रतिनिधिसभा विघटन विरुद्धया मुद्दाय् आः प्रधानमन्त्रीपाखेया वकिलतय्सं बहस यानाच्वंगु दु । प्रधानन्यायाधीश चोलेन्द्र शम्शेर जबरां प्रधानमन्त्रीया वकिलतय्त शुक्रवाः दुने बहस क्वचायेकेत ई बियातःगु दु । थ्व धुंकाः रिट निवेदनय् विपक्षी दयेकातःम्ह प्रतिनिधिसभाया सभामुखपाखें स्वम्ह वकिलतय्सं बहस याइ । विपक्षीया बहस क्वचायेधुंकाः उमिसं ल्ह्वंगु विषययात कयाः लिसः बीगु निंतिं
निवेदकया पक्षयात अदालतं हाकनं ई बी । थ्व धुंकाः इजलासयात ग्वाहालि यायेत गठन यानातःगु वरिष्ठ कानुनविद्–तय् पुचः एमिकस क्युरीपाखें बहस जुइ । थ्व धुंकाः प्रतिनिधिसभा विघटनयात कयाः लाःगु रिटय् प्रधानन्यायाधीशया नेतृत्वय् दुगु संवैधानिक अदालतं फैसला न्यंकी ।

प्रधानमन्त्रीपाखें नियुक्त वकिलपाखें शुक्रवाः बहस क्वचायेवं सभामुख पक्षयापिं वकिलतय्सं छन्हु, विपक्षीया वकिलं ल्ह्वंगु विषयय् लिसः बीत निवेदकतय्त छन्हु, एमिकस क्युरीयात निन्हु बियाः फैसला न्यंकेत इजलाशयात न्यान्हुति ई बिल धाःसां फागुन १० गते तकया दुने फैसला वयेफुगु खँ अधिवक्ता अर्यालं धयादीगु दु ।

बहस क्वचायेधुंकाः गबलय् फैसला न्यंकेगु धयागु इजलासया ल्हातय् जुइ । बहस क्वचायेकाः निन्हु प्यन्हुया ई कयाः नं फैसला न्यंकेफुसा फैसला न्यंकेगु न्हि नं तोके यायेफु । अथेहे न्हापां चीहाकलं फैसला न्यंकाः लिपा पूर्ण फैसला नं बीफुसा छक्वलं हे पूर्ण फैसला न्यंकेगु ज्या नं यायेफु ।

थ्व ल्याखं आः संसद पुनस्र्थापना जुइ वा मजुइ धयागु फैसला संवैधानिक इजलासं थ्व हे फागुनया मध्य तकया दुने वयेफुगु सीदुगु दु ।

सम्बन्धित बुखँ

LEAVE YOUR COMMENTS