ने. सं. ११४४ चौलाथ्व दशमी -

प्रदेश ७ जलविद्युतय् दकलय् धनी

येँ – जल तथा ऊर्जा आयोगया कथं नेपाःया न्हय्गू प्रदेश मध्ये जलविद्युत उत्पादन यायेफइगु ल्याखं दकलय् धनी प्रदेश प्रदेश नं. १ लाःगु जूगु दु । आयोगं सार्वजनिकया याःगु प्रारम्भिर प्रतिवेदन कथं नेपालय् ८२ हजार ८०० मेगावाट मत उत्पादन यायेफइ । आयोग खुसि बेसिनया आधारय् जलविद्युत क्षमताया मापन याःगु खः । थ्व आधारय् दकलय् अप्वः प्रदेश नं. ७ य् मत उत्पादन यायेफइगु खनेदुगु दुसा दकलय् म्हो प्रदेश नं. २ लय् उत्पादन जुइ ।प्रतिवेदन कथं प्रदेश नं. ७ या जलविद्युत उत्पादन क्षमता १८ हजार १४९ मेगावाट दु । थ्व कुल जलविद्युत उत्पादन क्षमताया २५ प्रतिशत थ्यंवः । प्रदेश नं. २ लय् धाःसा दकलय् म्हो मत उत्पादन जुइगु खनेदु ।

थन मुक्कं २०० मेगावाट जक मत उत्पादन यायेफइगु खँ प्रतिवेदनय् न्ह्यथनातःगु दु । प्रदेशगत ल्याखं प्रदेश नं. १ य् १२ हजार ९५३ मेगावाट, प्रदेश नं. ३ य् १२ हजार ६३१ मेगावाट, प्रदेश ४ य् १० हजार २२८ मेगावाट, प्रदेश नं. ५ य् १४ हजार ३० व प्रदेश नं. ६ य् ११ हजार ८०३ मेगावाट मत उत्पादन यायेगु क्षमता दु ।तर आः जलविद्युत आयोजना न्ह्यानाच्वंगु व विद्युत खरिद सम्झौता जुइधुंकूगु ल्याखं धाःसा प्रदेश नं. ४ न्ह्यःने लानाच्वंगु दु । विद्युत प्राधिकरणया कार्यकारि निर्देशक कुलमान घिसिङया कथं थ्व प्रदेशय् ३ हजार ३७३ मेगावाट बराबरया मत थीथी आयोजनापाखें न्यायेगु सम्झौता जुइधुंकूगु दु । अथेहे प्रदेश नं. १ पाखें २ हजार १३२ मेगावाट क्षमताया मत न्यायेगु निंतिं सम्झौता जुइधुंकूगु दु ।

खुसि बेसिनया आधारय् अध्ययन
आयोगं थीथी गुंगू खुसिइ बेसिनया आधारय् जलविद्युत उत्पादन क्षमता मापन याःगु खः । कमला, कन्काई, कोशी, बाग्मति, गण्डकी, राप्ती, बबई, कर्णाली व महाकाली खुसि बेसिनयात जलविद्युत उत्पादन क्षमताया उपलब्धताया ल्याखं अध्ययन याःगु खः । विभागया कथं महाकाली खुसिइ ६ हजार मेगावाट, कर्णाली, बबई व राप्ती खुसिइ २५ हजार मेगावाट, बागमति व गण्डकी खुसिइ २५ हजार मेगावाट व कोशी, कन्काइ व कमला खुसिइ २५ हजार मेगावाट क्षमताया आयोजना न्ह्याकेफइगु खनेदु ।देय्या कुल क्षमतामा मध्ये आः २८ हजार ८२३ मेगावाट क्षमताया आयोजना दयेकेगु तयारी जुयाच्वंगु खँ धाःगु दु । कुल क्षमता ८२ हजार ८०० मेगावाटया ४० प्रतिशतया योजना दयेकेगु निंतिं थीथी चरणय् ज्या जुयाच्वंगु खँ ऊर्जा मन्त्रालयं धाःगु दु । थुपिं मध्ये ४ हजार ४३० मेगावाट क्षमताया निंतिं थीथी आयोजनायात उत्पादन अनुमति हे बीधुंकूगु दु ।

१३ हजार ९५० मेगावाट क्षमताया निंतिं सर्वेक्षण अनुमति बीधुंकूगु खँ ऊर्जा मन्त्रालयं धाःगु दु ।मत उत्पादन अनुमति काःगु फुक्क धयाथें आयोजना निजी क्षेत्रया लगानी दुगु खँ धाःगु दु । स्वतन्त्र ऊर्जा उत्पादकतय् संस्था (इपान)या अध्यक्ष शैलेन्द्र गुरागाईया कथं अझं ५ जार मेगावाट क्षमताया निंतिं थीथी आयोजनापाखें अनुमति कायेगु तयारी जुयाच्वंगु दु । सरकारया बास्केट फण्डय् ३ हजार २४० मेगावाट क्षमताया आयोजना दनि । थ्व आयोजनायात सरकारं प्रतिस्पर्धाया आधारय् निजी ऊर्जा उद्यमीतय्त दयेकेबी । अथेहे सरकारं १ हजार २९४ मेगावाट क्षमताया आयोजनाया अध्ययन याये क्वचायेकेधुंकूगु दुसा ५ हजार ९०९ मेगावाट क्षमताया आयोजनाया अध्ययन यानाच्वंगु दु । थ्व फुक्कं आयोजना स्वायेबलय् २८ हजार ८२३ मेगावाट थ्यंवइगु खँ धाःगु दु ।सरकारं वइगु झिदँ दुने १७ हजार मेगावाट मत उत्पादन यायेगु लक्ष्य तयातःगु दु ।