साउदीइ प्रमाणिकरण दिकल

येँ – साउदी अरबय् नेपाःमि मिसा ज्यामितय्त चरम शोषण जुयाच्वंगु धासें अनया नेपाली दूतावासं मागपत्र प्रमाणीकरण दिकाबिउगु दु । रियादय् च्वंगु नेपाली दूतावासं सप्लाइ व कन्ट्य्राक्टिंग कम्पनीलिसे सम्बन्धित मागपत्रया प्रमाणीकरण यायेगु दिकूगु खँ धाःगु दु । नेपाःमि मिसा ज्यामितय्त न्यूनतम आधारभूत सुविधा तकं मबियाच्वंगु पुष्टि जुइवं दूतावासं सोमवाः निसें प्रमाणिकरण दिकाबिउगु खः ।

दूतावासं नेपाःमि ज्यामितय्त जुयाच्वंगु शोषणयात कयाः छगू सर्वे यायेधुंकाः थुकथं प्रमाणीकरण दिकेगु ज्या याःगु खः ।वैदेशिक रोजगारया निंतिं साउदी थ्यनाच्वंपिं मिसापिं ज्यामितय्त पारिश्रमिक मबिउगु, आवास सुविधा मानवीय मजूगु धयागु यक्व हे गुनासो वयेवं दूतावासं सर्वे याना स्वःगु खः ।

थ्व सर्वेक्षणया झ्वलय् यक्व हे मिसापिं ज्यामितय्त न्यूनतम पारिश्रमिक तकं मबिउगु, मिसा ल्वय् सम्बन्धी उपचार तकं मबिउगु, बीमा मयाःगु लिसें थीथी बहाना तयाः मेमेगु ज्या याकेगु यानाच्वंगु लुइकूगु खः । अथेहे सर्वेक्षणय् मागपत्र स्वयां पिहां वनाः स्वदँया करार याःगु, व्यवस्थापन वा सुपरभाइजयात गुनासो यात धाःसा वास्ता मयाइगु जक मखु अःखबतं धम्की तकं बिइगु, वसःया व्यवस्था मयाःगु बजार वनेगु इलय् साउदी परिचयपत्र अकामा व पासपोर्ट तकं मबिइगु यानाच्वंगु नं लुइकूगु खः ।

परिचय पत्र व राहदानी तकं मबिइगुलिं यानाः नेपाःमि ज्यामितय्सं थःपिनि आवासय् हे तयातइगु पसलय् थिकेक सामान न्यायेत बाध्य जुयाच्वंगु खः । थ्व सर्वेक्षणया झ्वलय् शोषणय् लानाच्वंपिं अप्वः थें मिसापिं ज्यामित सप्लाइ व कन्ट्य्राक्टिंग कम्पनीपाखेंवःगु खनेदयेवं थज्याःगु नेपाली दूतावासं थज्याःगु कम्पनीया प्रमाणीकरण दिकाबिउगु खः ।