मस्तय् चित्र तयाः सनराइज बैंकया क्यालेन्डर

येँ – सनराइज बैंकं स्कुलया मस्तय्सं च्वःगु थीथी चित्र तयाः वि.सं. २०७५या क्यालेन्डर पिकाःगु दु । बैंकं राष्ट्रिय न्हिपौत नागरिक, कान्तिपुर व अन्नपूर्ण पोस्टं वाःपतिकं पिकया वयाच्वंगु मचा विशेषांक नागरिक, कोपिला व अंकुरय् २०७४ सालया दछियंकं पिहां वःगु चित्र मध्ये झिंस्वपाः चित्रयात ल्ययाः क्यालेन्डरय् दुथ्याकूगु खः ।

सोमवाः सुथय् छगू ज्याझ्वःया दथुइ बैंकया अध्यक्ष मोतिलाल दुगड, संचालकपिं ई. बच्छराज तातेड, दीपक नेपाल, ज्योति कुमार बेगानी व प्रमुख कार्यकारी अधिकृत रत्नराज वज्राचार्यं मंकाः कथं क्यालेन्डर विमोचन यानादीगु खः । लिसें क्यालेन्डरय् दुथ्याःगु चित्र च्वःपिं मस्तय्त नगद लिसें चकलेट दोहलपा नं बिउगु खः ।

सनराइज बैंकं वंगु स्वदँ न्ह्यवनिसें थथे मस्तय् चित्र दुथ्याकाः क्यालेन्डर पिकया वयाच्वंगु खँ कनादिसें बैंकया सिइओ रत्नराज वज्राचार्यं मस्तय् प्रतिभा पिब्वयेगु ताःतयाः बैंकं थुकथं क्यालेन्डरय् थाय् बिया वयाच्वनागु खँ कनादिल ।