सौर्य ऊर्जाय् लगानीकर्ता आकर्षित
येँ – थौंकन्हय् सौर्य उर्जाय् लगानी याइपिनि ल्याः अप्वया वनाच्वंगु दु । ऊर्जा, जलस्रोत तथा सिँचाइ मन्त्रालय मातहतया विद्युत विकास विभागं आःतकया दुने ५७ गू आयोजनायात सर्वेक्षणया निंतिं अनुमति बीधुंकूगु दु । थ्व आयोजनात फुक्कं यानाः ४६८ मेगावाटया दु । सरकारं ऊर्जा मिश्रणया अवधारणा न्ह्यःने हयेधुंकाः सौर्य ऊर्जाय् लगानी याइपिनि ल्याः अप्वःगु खः ।
न्हापा चिचिधंगु ज्या व छेँया निंतिं जक छ्यलाबुलाय् वयाच्वंगु सौर्य ऊर्जा लिपांगु इलय् व्यावसायिक रुपं हे उत्पादन यायेगु पहल सुरु जूगु खः । नेपाल विद्युत प्राधिकरणं नुवाकोटय् २५ मेगावाट क्षमताया सौर्य परियोजनाया ज्या सुरु यायेधुंकूगु दु । थ्व आयोजना थौंकन्हय् दयेकेगु ज्या न्ह्यानाच्वंगु दु ।
प्राधिकरणं निजी क्षेत्रपाखें उत्पादन जुइगु कुल ६१ मेगावाट क्षमताया सौर्य परियोजनालिसे विद्युत खरिद सम्झौता यायेधुंकूगु दु । अमेरिकाया छगू कम्पनीं ६०० मेगावटा क्षमताया सौर्य परियोजनाया निंतिं इच्छा प्वंकूगु दु । अमेरिकी कम्पनी स्काइ पावरं सौर्य ऊर्जाय् लगानी यायेगु धकाः ऊजा, जलस्रोत तथा सिँचाइमन्त्री वर्षमान पुनयाथाय् प्रस्ताव यंकूगु दु ।
अथेहे विभागं चौधरी समूहयात नं १२० मेगावाट क्षमताया सौर्य परियोजना संचालनया निंतिं अनुमति बीधुंकूगु दु । महोत्तरीया ढल्केबारय् सौर्य परियोजना तयेत सर्वेक्षणया निंतिं थ्व अनुमति बिउगु खः । अथेहे चौधरी समूहयात हे बाजुराय् ५० मेगावाट व पर्साया परवानीपुरय् ३० मेगावाट क्षमताया सौर्य परियोजना दयेकेत सर्वेक्षणया निंतिं अनुमति बीधुंकूगु दु ।
अथेहे अपी पावरं नं देय्या थीथी गुंगू थासय् सौर्य परियोजनाया निंतिं सर्वेक्षण यायेत अनुमति कायेधुंकूगु दु । झापा इनर्जीं झापाय् १० मेगावाट क्षमताया सौर्य परियोजना संचालन यायेगु धकाः विभागपाखें सर्वेक्षण अनुमति कायेधुंकूगु दु । थौंकन्हय् विश्वव्यापी रुपं हे वैकल्पिक स्वच्छ ऊर्जाया रुपय् सौर्य परियोजनाया योजना व्यापक जुया वनाच्वंगु दु ।
भारतय् जक सन् २०१९ दुने १४ गिगावाट सौर्य ऊर्जा उत्पादन जूगु दु । थ्वहे दँया अन्त्य तकया दुने थ्व क्षमता अप्वया ३८ गिगावाट थ्यनीगु खँ धाःगु दु ।अथेहे चीनय् १३० गिगावाट सौर्य उत्पादन जुयाच्वंगु दुसा सन् २०२० तकया दुने २०० गिगावाट थ्यनीगु खँ धाःगु दु । अथेहे अमेरिकाय् ६० गिगावाट, जापानय् ४६ गिगावाट बराबरया सौर्य उर्जा उत्पादन जुयाच्वंगु दु ।
नेपाः सरकारं वंगु वैशाखय् सार्वजनिक याःगु श्वेतपत्रय् नं सौर्य व वायु ऊर्जायात नं ऊर्जाया स्रोत कथं छ्यलाः ऊर्जा मिश्रणया अवधारणा न्ह्यःने हःगु खः । सौर्य ऊर्जाया लिसें लिपांगु इलय् वायु ऊर्जा नं लगानीकर्ता आकर्षित जुया वयाच्वंगु दु ।
विभागं छुं ई न्ह्यव जक प्यंगू परियोजनायात ६ मगावाट क्षमताया वायु ऊर्जा उत्पादनया निंतिं सर्वेक्षण अनुमति बीधुंकूगु दु । अथेहे रिलायन्स सुगर मिलं पेले यायेधुंकूगु तुख्वःपाखें १५ मेगावाट क्षमताया मत उत्पादन यायेगु निंतिं विभागपाखें अनुमति कायेधुंकूगु दु ।
LEAVE YOUR COMMENTS