ग्लोबल आइएमइ व जनता बैंक मर्ज जुइगु, प्राइम कमर्सियलं कैलास विकास बैंक काइगु
येँ – ग्लोबल आइएमइ व जनता बैंक दथुइ मर्ज जुइगु जूगु दु । अथेहे प्राइम कमिर्सियल बैंकं कैलास विकास बैंकयात प्राप्ति (एक्विजिसन) याइगु जूगु दु । ग्लोबल व जनताया मर्जया निंतिं शुक्रवाः निगूलिं बैंकया संचालक समिति दथुइ समझदारी जूगु खः । मेखे प्राइमं कैलासयात प्राप्तिया निंतिं धाःसा सहमतिपत्र हस्ताक्षर याःगु दु ।
ग्लोबल व जनताया मर्जया समझदारी राष्ट्र बैंकय् नं वनेधुंकूगु खँ ग्लोबलया अध्यक्ष चन्द्रप्रसाद ढकालं कनादीगु दु । बैंक मर्ज लिपा नं वय्कःया अध्यक्ष जुयादीसा बैंकया नां ग्लोबल आइएमई हे जुइ । बैंकया प्रमुख कार्यकारी अधिकृत धाःसा जनता बैंकया परशुराम कुँवर क्षेत्री जुइ । अथेहे सञ्चालक समितिइ जनता बैंकपाखें निम्हेसिनं प्रतिनिधित्व याइ ।
मर्जया निंतिं शेयर स्वाप रेसिया ग्लोबलया प्रति कित्ता १०० तका हे जूगु दुसा जनताया ८५ तका जूगु दु । थ्व निगू बैंक दथुइ मर्जर प्रक्रिया प्यला दुने हे क्वचायेकेगु सहमति जूगु दु । मेखे प्राइमं कैलासया शेयरयात प्रत्ति कित्ता ९४ तकाया ल्याखं प्राप्ति यायेगु सहमति जूगु दु । कैलास बैंकयाके आः २ अर्ब ५२ करोड तका चुक्ता पुँजी दु ।
प्रति कित्ता ९४ तकाया ल्याखं कैलासया शेयर २ अर्ब ३६ करोड बराबरया जुइ वइ । प्राइमयाके आः ८ अर्ब ३ करोडया चुक्ता पुँजी दु । निगुलिं चुक्ता पुँजी ल्वाकछ्यायेबलय् झिगू अर्ब ३९ करोड जूवइ । कैलास लिसे शेयर आदानप्रदानया अनुपात मिले जुइवं कैलासयाके दुगु १ अर्ब ५ करोड जगेडा कोष मध्ये १५ करोड १२ लाख जगेडा कोषय् वनेत योग्य जुइ ।
अथेहे प्राइमयाके २ अर्ब ३३ करोडया कोष दु । थ्व निगुलिं जोडे यायेबलय्् ३ अर्ब ५४ करोड तका जगेडा कोषय् दइ । मेखे कैलासलिसे मर्ज जूसां प्राइमया ऋण अनुपात धाःसा असन्तुलित हे खनेदइगु जूगु दु । वंगु चैत मसान्त तकया ल्याखं कैलास बैंकया प्राप्ति लिपा नं प्राइमयाके निक्षेप ९८ अर्ब १४ करोड जक दइ , तर ऋण लगानी धाःसा ९६ अर्ब ४० करोड दु ।
निक्षेपया तुलनाय् त्यासा लगानी अप्वयाच्वंगुलिं निक्षेप व त्यासाय असन्तुलन धाःसा कायम हे जुइ ।प्राइमं थ्वयां न्ह्यव कन्काइ विकास बैंक व ललितपुर फाइनान्सयात नं प्राप्ति यायेगु सहमति यायेधुंकूगु दु । थुपिं निगू नं प्राप्ति यायेवं प्राइमया देय्न्यंकं १८९ शाखा दइगु खँ धाःगु दु ।
LEAVE YOUR COMMENTS