ने. सं. ११४४ कौलाथ्व षष्ठी -

बागमति प्रदेशं झिगू पर्यटकीय गन्तव्य दयेकीगु

येँ – बागमति प्रदेश सरकारं चालु आर्थिक दँ २०७६-७७ य् पर्यटन क्षेत्रया भौतिक पूर्वाधार निर्माण व प्रवद्र्धनया निंतिं स्वंगू अर्ब तक खर्च यायेगु कथं योजना दयेकूगु दु। प्रदेश सरकारं पर्यटन पूर्वाधार विकास निर्माण, प्रचारप्रसारया ज्यायानिंतिं थ्व ध्यबा खर्च यायेत्यंगु खः ।

प्रदेशया उद्योग, पर्यटन तथा वातावरण मन्त्रालयं निगू अर्ब ८७ करोड ९५ हजार तकाया योजना तयार यानाः ज्या न्ह्याकूगु खँ धाःगु दु। मन्त्रालयं थ्व दँय् पर्यटन पूर्वाधार विकास कार्यक्रमया निंतिं छगू अर्ब छगू करोड ५३ लाख९५ हजार तका फ्याःगु खँ मन्त्तालयया योजना अधिकृत हेम पाठकं धयादीगु दु। अथेहे स्थानीय पर्यटन प्रवद्र्धन कार्यक्रमया निंतिं ५९ करोड ७५ लाख विनियोजन याःगु दु ।

प्रदेश सरकारं प्रदेश दुनया झिगू पर्यटकीय गन्तव्य थाय् तोके यानाः हे आवश्यक भौतिक पूर्वाधार विकास ज्या न्ह्याकूगु खः । मन्त्रालयं स्वनिगः बाहेक झिगू जिल्लाया थाय् हे तोके यानाः एकीकृत भौतिक पूर्वाधारया विकास यानाः ‘छगू जिल्ला छगू नमूना पर्यटकीय गन्तव्य’ दयेकेत्यंगु खँ मन्त्रालयया अधिकृत पाठकं धयादिल ।

प्रदेश सरकारं दोलखाया सैंलुब, सिन्धुलीया हरिहरपुर गढी, काभ्रेया वासुकी थुम्का, नुवाकोटया ककनी, सिन्धुपाल्चोकया व्रम्हायणी, धादिबया रुबी भ्याली, रसुवाया सोम्दाब, मकवानपुरया दामन चित्लाब, चितवनया मेघौली व रामेछापया जिरी शिवालययात पर्यटकीय गन्तव्य कथं ल्यःगु खः । थ्व गन्तव्य मन्त्रालयं तप्यंक ल्यःगु मखसे जिल्लापाखे छनोट यानाः हःगु आधारय् ल्यःगु खँ धाःगु दु। स्वनिगःया स्वंगू जिल्ला येँ, यल व ख्वपया निंतिं मन्त्रालयं बिस्कं हे कार्यक्रम लागू यायेत्यंगु दु। मन्त्रालयं स्थानीय तहलिसे जानाः स्वनिगःया निंतिं विशेष योजना दयेकेगु तयारी याःगु खः । मन्त्रालयं छगू पर्यटकीय गन्तव्ययात ५० करोड खर्च यायेगु योजना अन्तर्गत प्रत्येक गन्तव्यय् हरेक दँय् न्यागू करोड खर्च यानाः झिदँ दुने पूर्णता बीगु योजना दयेकीगु खः ।

मन्त्रालयं पर्यटकीय गन्तव्य तोके याःगु चितवन, रसुवा व काभें स्वंगू जिल्लाया पर्यटकीय गन्तव्य बाहेक मेगु न्हय्गू जिल्लाया गन्तव्य थासय् हिल स्टेशन दयेकेगु ज्या सुरु यायेधुंकूगु दु। प्रदेशया हेटौंडा उपमहानगरपालिका लिसें नगरपालिका, गाउँपालिकां थःथःगु क्षेत्रया धार्मिक, ऐतिहासिक, पुरातात्विक महत्व ज्वनातःगु पर्यटकीय गन्तव्यया पूर्वाधार विकास ज्या न्ह्याकूगु दु ।