दँय् पौने खर्बया वासः खपत
येँ – नेपालय् दँय् थ्यंमथ्यं पौने खर्ब तका बराबरया वासः कारोवार जुयाच्वंगु खँ धाःगु दु । वासः व्यवसायीतय्सं थ्व ल्याः दँय् दसं अझ अप्वया वनीगु खँ नं धाःगु दु । नेपाल औषधी व्यवसायी संघया महासचिव हरिप्रसाद बिडारी नेपालय् दँय् ७० अर्ब तका बराबरया वासः खपत जुयाच्वंगु खँ धयादीगु खः ।
मेखे नेपाल औषधी विभागं धाःसा दँय् ३६ अर्ब तका बराबरया वासः खपत जुयाच्वंगु खँ धाःगु दु । विभागया कथं थ्व मध्ये बछि धयाथें वासः स्वनिगः दुने हे खपत जुयाच्वंगु दु । विभागया महानिर्देशक नारायण ढकालं स्वदेशय् उत्पादन जूगु व विदेशं आयात जूगु वासः यानाः दँय् ३६ अर्बया वासः खपत जुयाच्वंगु खँ धयादीगु खः ।
औषधी व्यवसायी संघया महासचिवया कथं स्वदेशी विदेशी वासः, वासः दयेकीगु कच्चा पदार्थ व सर्जिकल सामान न्हापां यानाः ७० अर्बया कारोवार जुयाच्वंगु खः । विदेशं वासः आयात याइगु संस्थातय् संगठन औषधि आयातकर्ता संघया महासचिव पवन आचार्यं दँय् २६ अर्ब तका बराबरया वासः आयात जुयाच्वंगु खँ धयादीगु दु ।
दछियंकं खपत जुइगु वासः मध्ये ४५ प्रतिशत जक नेपालय् उत्पादन जुइ ।आयातकर्ता संघया महासचिव आचार्यं विदेशं वइगु वासः मध्ये ४० प्रतिशत स्वनिगलय् हे खपत जुयाच्वंगु खँ धयादीगु दु ।‘स्वनिगलय् यक्व विशेषज्ञसहित कडा रोगया उपचार जुइगु, सेवा सुविधा व उपचार पहुँचया ल्याखं देन्यंकंया विरामी वइगु जूगुलिं थन यक्व वासः खपत जुइगु खः’ महासचिव आचार्यं धयादीगु दु ।
नेपाः वइगु वासः मध्ये ८० निसें ९० प्रतिशत भारतीय जुइसा मेगु स्वंगूगु मुलुकं वइ ।नेपाल औषधी विभागय् देन्यंकं यानाः २१ हजार गू फार्मेसी पसः दर्ता जुयाच्वंगु दुसा न्याद्वलं मल्याक वासः पसः दर्ता मयासे हे संचालन जुयाच्वंगु औषधी व्यवसायी संघया महासचिव विडारीं कनादिल ।अथेहे नेपालय् ९० गू वासः दयेकीगु कम्पनी दर्ता जुयाच्वंगु दु । उकी मध्ये ७० गू कम्पनीं वासः उत्पादन यानाच्वंगु दु ।
LEAVE YOUR COMMENTS