कर छले याःगुलिं कोका कोलायात मुद्दा

येँ – बहुराष्ट्रिय कम्पनी कोका कोला विरुद्ध कर छलीया मुद्दा दायर जूगु दु । ३ अर्ब ७१ करोड ८१ लाख तका बराबरया कर छले याःगु द्वपनय् राजस्व अनुसन्धान विभागं म्हिगः उच्च अदालतय् मुद्दा दायर याःगु खः ।

उच्च अदालतया कथं विभागं २०७१ सालय् कम्पनीं शेयर मीगु झ्वलय् लाभकर मपूगु धासें ३ अर्ब ७१ करोड ८१ लाख ५० हजार ४११ तका बिगो व उकिया सतप्रतिशत बं यानाः मुक्कं ७ अर्ब ४३ करोड ६३ लाख ८२२ तका माग दावी यासें मुद्दा दायर याःगु खः ।

कोका कोलाया स्वामित्व मीगु झ्वलय् कर छले याःगु धासें विभागं मुद्दा तःगु खः । नेपालय् च्वंगु बोटलर्स नेपाल लिमिटेडया अधिकांश शेयरया स्वामित्व दुगु दुबईया साब्को एसियाया शतप्रतिशत शेयर सन् २०१४ य् आयरल्यान्डय् च्वंगु युरोपियन रिफ्रेसमेन्टयात मीगु झ्वलय् राजस्व चुहावट जूगु खँ धाःगु दु ।