खा लहीत जक २० अर्ब मल्याक दां पिहां वनाच्वन

येँ – खा (चिकेन)य् नेपाः आत्मनिर्भर जुइगु धाःसां खा लहिगु निंतिं जक दँय् २० अर्बं मल्याक ध्यबा देशं पिहां वनाच्वंगु तथ्यांक पिहां वःगु दु । थ्व ध्यबा खा लहीत माःगु कच्चा पदार्थ, प्यारेन्ट चल्ला, वासः, भिटामिन, उपकरणय् खर्च जुयाच्वंगु खः । थज्याःगु ज्वलं फुक्कं विदेशं हे आयात यायेमाःगु जूगुलिं खाया लाय् आत्मनिर्भर जूसां ध्यबा धाःसा विदेशय् वनाच्वंगु दु ।

नेपाल उद्योग वाणिज्य महासंघया केन्द्रीय दुजः व कृषि वन समितिया संयोजक डा. तिलचन्द्र भट्टराईं दानाया कच्चा पदार्थय् जक दँय् झिंखुगू अर्ब ध्यबा देशं पिहां वनाच्वंगु खँ राससयात कनादिल । वय्कःया कथं दानायात माःगु मुस्या, कःनि, क्वँयेया धू, सूर्यमुखिया धू, चिकं पेले यानाः वःगु खौ, क्याल्यिम पदार्थ भारतया लिसें मेमेगु देशं आयात याना वयाच्वंगु दु ।

अथेहे दँय् निगू अर्बं मल्याक ध्यबा वासः व भ्याक्सिनया निंतिं व छगू अर्ब दां उपकरण न्यायेत ध्यबा पिहां वनाच्वंगु खँ नं वय्कलं धयादिल । अथेहे प्यारेन्ट चल्ला न्यायेत थगुने ६४ करोड तका दां नेपालं पिहां वन । वंगु आर्थिक दँय् नं ११ लाख स्वयां अप्वः ब्वाइलर प्यारेन्ट चल्ला व छगू लाख ८ हजार लेयर प्यारेन्ट चल्ला आयात जूगु तथयांक दु ।

लेयर्स प्यारेन्टया च्यासः व ब्वायलरया निंतिं न्यासः तका तू । नेपालय् लेयर्स प्यारेन्ट उत्पादन हे मजूसा ब्वाइलर प्यारेन्ट तसकं म्हो जक उत्पादन जुइगु जुयाच्वंगु दु । प्यारेन्ट चल्ला थाइल्यान्ड, मलेसिया थेंज्याःगु एशियाली देसं निसें अस्टे«ेलिया, फ्रान्स, जर्मनीं तकं आयात जुयाच्वंगु खँ पोल्ट्री महासंघया अध्यक्ष गुणचन्द्र विष्टं राससयात धयादीगु दु ।

थज्याःपिं प्यारेन्टतय्सं थ्वःगु ख्येँचं हे चल्ला पिकायेगु याइ । दँय् नीगू अर्बं मल्याक पोल्ट्री फार्मया निंतिं आवश्यक सामानया आयात जुयाच्वंगुसां नेपाःया पोल्ट्री फार्मं उत्पादन जूगु सामान धाःसा निर्यात जुइ फयाच्वंगु मदु । राज्यया नीतिगत अस्पष्टताया कारणं आयात अप्वया वनाच्वंगु व निर्यात म्हो जुयाच्वंगु खँ महासंघ अध्यक्ष बिष्टं कनादिल ।

आयात अप्वः निर्यात जू हे मजूगुलिं पोल्ट्री पाखे नेपालं यक्व हे व्यापार घाटा फयेमालाच्वंगु दु । नेपाल ह्याचरि उद्योग संघया केन्द्रीय अध्यक्ष टिकाराम पोखरेलं नेपालय् हे कःनि व मुस्याया व्यावसायिक बाली याःगु खःसां ७० प्रतिशत पोल्ट्रीया व्यापार घाटा म्हो यायेफइ । अथेहे प्यारेन्ट चल्ला उत्पादन क्षमता अप्वयेके फत धासा थप १० प्रतिशत व्यापार घाटा म्हो यायेफइगु खँ वय्कलं धयादीगु दु ।

थौंकन्हय् नेपालय् ब्वाइल चल्ला छवाःया दुने २५ निसें ३० लाख, लेयर्स चल्ला छवाःया दुने १ लाख ५० हजार निसें निगू लाख तक व प्यारेन्ट २० हजारति जक उत्पादन जुयाच्वंगु दुसा पोल्ट्री ख्यलय् जक ७० अर्बं मल्याक दां लगानी जुयाच्वंगु दु ।