श्रीलंकाय् गोटाबा राजापाक्ष राष्ट्रपतिइ निर्वाचित

श्रीलंकाया राष्ट्रपतिइ विपक्षी दलपाखें उम्मेदवार जुयादीम्ह पुलांम्ह रक्षामन्त्री गोटाबाया राजापाक्ष निर्वाचित जुयादीगु दु । थ्यंमथ्यं झिदँ तक रक्षामन्त्री जुयादीधुंकूम्ह तमिल टाइगर्सया द्वन्द्व अन्त्य यायेगु निंतिं महत्वपूर्ण भूमिका म्हितेदीम्ह राजापाक्षे आइतवाः राष्ट्रपतिइ निर्वाचित जुयादीगु खः ।

श्रीलंकाली सेनाया पुलांम्ह लेफ्टिनेन्ट कर्णेल नं जुयादीम्ह राजापाक्षं थ्यंमथ्यं ५३ प्रतिशत मत काःगु खँ धाःगु दु । वय्कलं सत्तारुढ दलपाखें उम्मेदवार जुयादीम्ह सजिथ प्रेमादासयात बुकूगु खः । नवनिर्वाचित राष्ट्रपति गोटाबाया शपथ ग्रहण छन्हु निन्हुं जुइगु खँ धाःगु दु ।

राष्ट्रपतिइ निर्वाचिन राजापाक्ष पुलांम्ह राष्ट्रपति महिन्दा राजापाक्षेया किजा खः । महिन्दा राजापाक्षे राष्ट्रपति जुयाच्वंगु इलय् हे आः निर्वाचित गोटाबा राजापाक्षे रक्षामन्त्री जुयादीगु खः । निर्वाचन आयोगया अध्यक्ष महिन्दा देशाप्रियां शनिवाः जूगु मतदानय् ८० प्रतिशत मतदाता सहभागी जूगु खँ धाःगु दु ।