उत्तर कोरियापाखें ३० लाख खोप अस्वीकार

एजेन्सी- उत्तर कोरियां थ्यंमथ्यं ३० लाख कोरोना विरुद्धया खोप कायेत अस्वीकार याःगु दु । संयुक्त राष्ट्र संघं बिउगु जानकारीकथं उत्तर कोरियां थःपिंत बिइत्यंगु खोप, खोपया अभाव जुयाच्वंगु व कोरोनां प्रभाव लाकाच्वंगु देय्तय्त बिउसां जिउ धाःगु दु । उत्तर कोरियायात अन्तर्राष्ट्रिय कोभ्याक्स ज्याझ्वः अन्तर्गत चीनय् निर्माण जूगु सिनोभ्याक खोप बिइत्यंगु खः ।

विश्व स्वास्थ्य संगठनं बिउगु जानकारीकथं अगस्ट १९ तारिख तक उत्तर कोरियां कोरोना संक्रमणया छगू नं विवरण दर्ता याःगु मदुनि । विश्व स्वास्थ्य संगठनया साप्ताहिक रिपोर्टय् उत्तर कोरियाय् आतक ३७२९१ म्ह स्वाथ्यकर्मीतय्के सेखं चाःगु जक खनेदुगु व कोरोना खनेमदुगु धयातःगु दु । उत्तर कोरियां कोरोना शुरु जुसां निसें हे नियम कडा यातःगु दु । अथे हे अन्तर्राष्ट्रिय सीमाना नं बन्द यानातःगु दु ।
उत्तर कोरियां वंगु जुलाईलय् २० लाख डोज एस्ट्राजेनेका खोप अस्वीकार याःगु खः । अथे हे रुसं बिइ धाःगु खोप नं उत्तर कोरियां स्वीकार मयाः । उत्तर कोरियां खोपया प्रभावयात कयाः न्ह्यसः तयावयाच्वंगु दु ।