बन्दूक उत्पादन याइगु कम्पनीत विरुद्ध मुद्दा

एजेन्सी- मेक्सिकों अमेरिकाया बन्दूक उत्पादन याइगु थीथी कम्पनीविरुद्ध मुद्दा तःगु दु । थुपिं कम्पनीतय्सं व्यापारिक आचरण लापारवाही यानाः गैरकानूनी रुपं बन्दूकया व्यापार यानाः रक्तपात यायेत ग्वाहालि यानाच्वंगु द्वपं बिउगु दु । अथे हे मेक्सिकों थुपिं कम्पनीतय्सं तस्करी यानाः मेक्सिकोय् च्वंपिं आपराधिक पुचःतय्त बन्दुक मिउगु द्वपं नं बिउगु दु । मेक्सिकाें १० अर्ब अमेरिकी डलरया क्षतिपूर्तिया माग नं याःगु दु ।

मेक्सिकों अमेरिकाया बन्दूक उत्पादन याइगु कम्पनी स्मीथ एण्ड वेसन, फायर आम्र्स व मेमेगु कम्पनी विरुद्ध मुद्दा तःगु खः । कम्पनीतय्सं धाःसा थ्व विषययात कयाः न्ववाःगु मदुनि । मेक्सिकोय् ७० प्रतिशत बन्दुक अमेरिकां तस्करी जुया वनीगु खः ।