येँ मनपां मधुमेह समाजया भवन दयेकेत जग्गा उपलब्ध याना बीगु

येँ – येँ महानगपालिकां नेपाल मधुमेह समाजया भवन दयेकेत जग्गा बीगु जूगु दु । येँ मनपां समाजया थःगु हे भवन दयेकेत जग्गा उपलब्ध याना बीगु जूगु दुसा वरिष्ठ मुटुल्वय् विशेषज्ञ डा. मृगेन्द्रराज पाण्डें आर्थिक ग्वाहालि याइगु जूगु दु । समाजया भवनया निंतिं येँ मनपां जग्गा उपलब्ध याना बीगु व मृगेन्द्र–सम्झना गुथिया संस्थापकतकं जुयाच्वनादीम्ह चिकित्सक पाण्डें आर्थिक ग्वाहालि यायेगु प्रतिवद्धता प्वंकादीगु खः ।

थौंन्हय् येँ मनपा वडा नंं. २३ स्थित ओमबहाःया नबहिलिइ ज्याकू दुगु समाजं मधुमेह (चिनील्वय्)या ल्वगितय्त सेवा बिया वयाच्वंगु दु ।
समाजं ग्वसाः ग्वःगु छगू ज्याझ्वलय् येँ मनपाया मेयर विद्यासुन्दर शाक्यं समाजया भवन दयेकेत आवश्यक जुइगु जमिन उपलब्ध याना बीगु जानकारी बियादीगु खः । लिसें वय्कलं उकिया निंतिं जग्गा मालेत नं इनाप यानादिल ।

महानगरपालिकां स्वास्थ्य सेवायात सहज रुपय् उपलब्ध याकेगु ल्याखं घरदैलो ज्याझ्वः संचालन याना वयाच्वंगु जानकारी बियादिसें चिनील्वय् विरुद्धया अभियानय् महानगरपालिकाया नं ग्वाहालि यायेगु मेयर शाक्यं धयादिल ।

ज्याझ्वय् वरिष्ठ मुटुल्वय् विशेषज्ञ डा. पाण्डें समाजया भवन दयेकेत छगू करोड आर्थिक ग्वाहालि यायेगु प्रतिवद्धता प्वंकादीगु खःसा समाजया अध्यक्ष शिव श्रेष्ठं समाजया थःगु हे भवन मदुगुलिं चिनील्वय्या सेवा उपलब्ध याकेत समस्या जुया वयाच्वंगु जानकारी बियादीगु खः ।