ने. सं. ११४४ कछलागा षष्ठी -

‘वन बेल्ट वन रोड’ सफल यायेत स्वयंसेवा अभियान

येँ – जःलाखःला देय् चीनं न्ह्यःने हयाच्वंगु ‘वन बेल्ट वन रोड’ योजनायात ग्वाहालि यायेगु लागिं स्वयंसेवी ख्यःपाखें नं थीथी ज्याझ्वःत याइगु जूगु दु । नेपालय् नं अज्याःगु ज्याझ्वःत न्ह्याकेगु ताः तयाः चीनया युथ कम्युनिष्ट लीग बेइजिङ कमिटीया छगू पुचः नेपाः थ्यंकः वःगु दु । नेपाःया अरनिको समाजया ब्वनाय् उगु पुचः नेपाः वःगु खः ।

म्हिगः समाजपाखें याःगु छगू ज्याझ्वलय् उगु पुचःया नेता लिसें युथ कम्युनिष्ट लिग बेइजिङ कमिटीया उपमहासचिव युयान हैं थःपिनि संस्थां यानाच्वंगु ज्याखँया बारे जानकारी बियादिल । पुचःया दुजः सिउ जिङं चीनं न्ह्यःहे हःगु वन बेल्ट वन रोड योजनायात जनस्तरय् समेत ग्वाहालि यायेगु लागिं स्वयंसेवक अभियान न्ह्याकागु खँ कनादिल ।

थःपिनि संस्थालिसे विश्वया ३८ गू स्वाः वयेधुंकूगु व नेपालय् अरनिको समाजलिसे जानाः ज्या यायेगु खँ नं वय्कलं कनादिल ।
चीनय् बेइजिङ ओलम्पिक कासा जूबलय् आपालं स्वयंसेवक प्रयोग यानाः ततःधंगु ज्या याःगु खः । अन थौंकन्हय् ४ करोड २० लाख स्वयंसेवकत थ्व संस्थाय् आवद्ध दु ।

ज्याझ्वलय् अरनिको समाजया नायः डा. सर्वोत्तम श्रेष्ठं चीनय् स्वयंसेवायात अतिकं व्यवस्थित ढंगं सञ्चालन यानाच्वंगु खनाः थःपिंसं नेपालय् नं उकियात न्ह्याकेगु ताः तयागु खँ कनादिल । बेइजिङय् थगुने जूगु उगु संस्थाया सम्मेलनय् अरनिको समाजया नायः डा. सर्वोत्तम श्रेष्ठ व प्रथम उपाध्यक्ष डा. मनोजमान श्रेष्ठं ब्वति कयादीगु खः ।