तलब अप्वयेकेत जिफन्टया लबिङ

येँ – वइगु आर्थिक दँया बजेटय् कर्मचारीया तलब अप्वयेकेत लबिङ शुरु जूगु दु । एमालेया आधिकारिक ट्रेड युनियन जिफन्टं थ्व लबिङ याःगु खः । ट्रेड युनियनं कर्मचारीया तलब २० प्रतिशत तक अप्वयेकेमाः धासें लबिङ शुरु याःगु खः । ट्रेड युनियन पदाधिकारीतय्सं ‘समृद्ध नेपाल, सुखी नेपाली’ या नारायात पूवंकेगु निंतिं तलब अप्वयेकेमाःगु माग याःगु खः ।

सूत्रया कथं उगु नारा पूवंकेगु मू ल्वाभः कर्मचारी जूगुलिं कर्मचारीया मनोबल थकायेत नं थुगु दँय् कर्मचारीया तलब अप्वयेकेमाः धकाः लबिङ यानाच्वंगु दु । थुगु दँ नियमित तलब अप्वयेकेगु दँ नं जूगुलिं ट्रेड युनियनं थुकथं लबिङ शुरु याःगु खः । वंगु निदँ न्ह्यवंनिसें तलब थहां मवंगुलिं नेपाल राष्ट्र बैंकया मूल्य वृद्धि सूचकांक व देशं निर्धारण याःगु समृद्धिया आज्जुयात पूवंकेत नं तलब अप्वयेकेमाः धासें युनियन पदाधिकारीतय्सं प्रधानमन्त्रीयाथाय् लबिङ यानाच्वंगु खः ।

ट्रेड युनियनया उगु मागयात कयाः प्रधानमन्त्री नं सकारात्मक जुयाच्वंगु दावी सूत्रं याःगु दु । प्रम ओली स्वयम् नं तलब अप्वयेकेमाः धइगु पक्षय् दुगु खँ सूत्रं धाःगु दु । थःगु सरकारं क्वःछिउगु नारायात सार्थक यायेगु निंतिं कर्मचारीयात लय्तायेमाः धइगु पक्षय् प्रम ओली दुगुलिं नं तलब अप्वयेकीगु सम्भावना दुगु खँ धाःगु दु ।

बजेट दयेकेगु ई न्ह्याः वयाच्वंगुलिं तत्काल गुलि प्रतिशत तलब अप्वयेकी धइगु बारे धाःसा छुं खँ वःगु मदुनि । थुकिया निंतिं अर्थ मन्त्रालयलिसे सहलह यानाः जक क्वःछी धाःगु दु । थौंकन्हय् मुख्य सचिवया तलब २० प्रतिशत अप्वयेकल धाःसा ६६,२४० तका थ्यनी । अथेहे कार्यालय सहयोगीया तलब थौंकन्हय् १८,००० दुसा अप्वयेकेबलय् २१,६०० तका थ्यं वनी ।