ख्वालय् हाखः पानाः पुस २७ हन

किपुली हाकुगु न्हि

किपू – म्हिगः पुस २७ गते पृथ्वीनारायण शाहया बुन्हियात किपूया जनतां हाकुगु दिवसया रुपय् न्यायेकल । हाकुगु न्हि हनेगु झ्वलय् किपुली नं पहिचानवादी नेतातय्सं थःगु ख्वालय् थःपिंसं हे हाखः पानाः विरोध प्रदर्शन याःगु खः । म्हिगः पृथ्वीनारायण शाहया बुन्हि कुन्हु हे लाकाः प्रदेश ३ या नां बागमति तयेगु निर्णय यासें पहिचानया आन्दोलनयात समाप्त यायेगु कुतः याःगु धासें अभियानकर्तातय्सं थुकिया विरुद्ध अझ तच्वःगु आन्दोलन यायेगु घोषणा याःगु खः ।

थनया लाय्कुली जूगु उगु ज्याझ्वलय् अभियन्ता श्रीकृष्ण महर्जनं दकलय् न्हापां थःगु ख्वालय् थम्हं हाखः पानाः ज्याझ्वः न्ह्याकूगु खः । वयां लिपा मेपिं नं अभियन्तातय्सं ख्वालय् हाखः पायेगु शुरु याःगु खः । ख्वालय् हाखः पानाः विरोध प्रदर्शन यायेगु उगु ज्याझ्वःयात आदिवासी जनजाति आन्दोलनया न्ह्यलुवात लक्ष्मण थारु, आबकाजी शेर्पापिंसं नं ऐक्यवद्धता क्यँसें ख्वालय् हाखः पानादीगु खः ।

वयां लिपा अनं तुं छगू ¥याली पिकासें पृथ्वीनारायण शाहयात थुकलं बीगु धकाः छ्याकः ल्वहं दुथाय् वंबलय् अन प्रहरी च्वनाः छ्याकः ल्वहंयात घेरे याना तःगु खः । उमिसं अन ल्वहँतय् सुयातं थुकलं बीके मबिउगु खः । प्रहरीं ल्वहंयात घेरे याना तःगुलिं अभियन्तातय्सं उकिया नापसं च्वंगु मेगु ल्वहँतय् थुकलं बियाः पृथ्वीनारायण शाहप्रति घृणा प्रकट याःगु खः । थ्व थासय् थौं मखुसा कन्हय् जूसां ई फानाः घृणा प्वंकेगु धासें ज्याझ्वः क्वचायेकूगु खः ।

उगु ज्याझ्वः नेवाः प्रदेशय् आदिवासी जनजाति जागरण अभियान, शेभ नेपाः भ्याली, नेवाः सांस्कृतिक पुनर्जागरण अभियानया मंकाः ग्वसालय् जूगु खः ।

किपुली दँय्दसं पुस २७ गते छ्याकः ल्वहँतय् थुकलं बियाः हाकुगु न्हि हनेगु याना वयाच्वंगु दु ।

सम्बन्धित बुखँ

LEAVE YOUR COMMENTS