मेलम्चीया ठेकेदार लित छ्वया हल

येँ – मेलम्ची खानेपानी आयोजना ठेक्का लाकाः ज्या यायेत वंगु कम्पनीयात स्थानीय ठेकेदारतय्सं लित छ्वयाहःगु दु । न्हापा सीएमसीलिसे जानाः ज्या यानाच्वंपिं ठेकेदारतय्सं थःपिनिगु ध्यबा मपूगु धासें मेलम्ची आयोजनाया मुहान क्षेत्रय् ज्या यायेत वःगु श्रेष्ठ कन्ट्रक्सनया ज्यामितय्त लित छ्वःगु खः ।

थःपिंत ठेक्का लायेवं ज्या याइपिं ज्यामित ज्वनाः ठेकेदार कम्पनी मेलम्चीया मुहानय् थ्यंगु खः । तर स्थानीयवासी आयोजनाय् थःपिसं काये ल्यं दनिगु ध्यबा बीधुंकाः जक ज्या न्ह्याकेमाःगु व मखुसा ज्या यायेगुलिं पंगः थनेवं ठेकेदार कम्पनीया मनूत लिहां वंगु खँ स्थानीय संघर्ष समितिया अध्यक्ष उत्तमकुमार श्रेष्ठं कनादीगु दु ।

ठेकेदार कम्पनी सीएमसी बिसिउँ वंगुलिं स्थानीय ठेकेदारयात बीमाःगु डेढ अर्ब तका भुक्तानी नं थाति लानाच्वंगु दुसा उमिसं सरकारं उगु ध्यबा भुक्तानी यायेमाःगु माग याना वयाच्वंगु खः । सरकारं सीएमसीया ३ अर्ब तका सीएमसीया धरौटी जफत याःगुलिं उकिं थःपिंत भुक्तानी बीमाःगु थःपिंसं सरकारयाके ध्यबा फ्वनागु मखुसें जफत जूगु ध्यबां थःपिंत भुक्तानी जुइमाःगु माग नं श्रेष्ठं यानादीगु दु ।