ने. सं. ११४४ कौलाथ्व पारू - नःलास्वनेगु

पत्रकार महासंघया तःमुँज्याय् फोनिजया प्रदर्शन

येँ (नेपालभाषा टाइम्स)- येँया राष्ट्रिय सभागृहय् म्हिगः जूगु नेपाल पत्रकार महासंघया तःमुँज्याय् आदिवासी जनजाति पत्रकार महासंघ (फोनिजं) पत्रकार संघया संस्थापक सभापति सत्यनारायण बहादुर श्रेष्ठया किपा दुगु पोष्टर तयाः लसकुस यात । पत्रकार महासंघं थःपिनि संस्थापक सभापति कृष्णप्रसाद भट्टराई धकाः बियातःगु मान्यतायात हाथ्या बिसें फोनिजं म्हिगः राष्ट्रिय सभागृह पिने सत्यनारायण बहादुर श्रेष्ठया किपा ब्वयाः पत्रकार महासंघयात हाथ्या बिउगु खः ।

फोनिजपाखें म्हिगः राष्ट्रिय सभागृहया हलय् दुहां वनीगु मू लुखाय् सत्यनारायण बहादुर श्रेष्ठया किपा तयाः श्रद्धाञ्जलि प्वंकेगु व्यवस्था नं याःगु दु । हलय् दुहां वंपिं विशेष यानाः जनजाति पत्रकारतय्सं उगु किपाय् वनाः स्वां देछानाः वंगु खःसा मेपिंसं वेवास्ता याःगु खः ।

छुं ई न्ह्यः फोनिजं विरोध याःगु पत्रकार महासंघया पूर्व सभापतितय् जीवनी सफू नं म्हिगः अन मियातःगु खःसा फोनिजया पत्रकारतय्सं उगु सफू अन मी दइ मखु धकाः नं विरोध याःगु खः । उगु विरोध यायेगु ज्याय् नेवाः पत्रकार राष्ट्रिय दबू, दलित पत्रकार मञ्च, मधेसी पत्रकार मञ्चया दुजःतय्सं नं ब्वति काःगु खः ।

म्हिगः हे फोनिजया कार्यवाहक महासचिव समीर बलामिं छगू वक्तव्य पिकासें पत्रकार महासंघया संस्थापक सभापति सत्यनारायण बहादुर श्रेष्ठयात हे माने यायेमाः धकाः नं माग याःगु खः ।
थ्वहे झ्वलय् पत्रकार महासंघं थुकिया बारे अध्ययन याकेत थीथी विश्वविद्यालयया प्राध्यापकत तयाः छगू कार्यदल दयेकेगु खँ धाःगु सीदुगु दु ।