‘सिधाकुरा’ यात कारवाही प्रशंग, अदालत–पत्रकार टक्कर

येँ (नेपालभाषा टाइम्स)÷ ‘सिधाकुरा डटकमं’ नांगु अनलाइनयात सर्वोच्च अदालतपाखें याःगु कारवाहीया सिफारिसयात कयाः न्यायालय व देय्या सञ्चार ख्यः दथुइ टकरारया अवस्था ब्वलंगु दु । न्यायालय राज्यया स्वंगूगु अंग खःसा पत्रकारितायात प्यंगूगु अंगया मान्यता बियातःगु दु ।

उगु अनलाइनपाखें छुं न्हिं न्ह्यः सर्वोच्च अदालतया न्यायाधीशयात स्वानाः प्रकाशन याःगु छगू समाचारं देय्या ‘फौजदारी कानुन उल्लंघन याःगु’ धासें कारवाही प्रक्रिया न्ह्यःने न्ह्याकेवं थ्व तनाव ब्वलंगु खः ।
सर्वोच्चपाखें जारी याःगु उकथंया कारवाहीया सिफारिसयात पत्रकार महासंघ लगायत थीथी पार्टीलिसे आवद्ध पत्रकार संघतय्सं विरोध याना हःगु दु । पत्रकार महासंघया महासचिव रोशन पुरीं म्हिगः छगू वक्तव्य जारी यासें सर्वोच्च अदालतया थ्व आदेशं प्रेस स्वतन्त्रयात हाथ्या बिउगु व प्रकाशित छुं नं समाचारय् चित्त बुझे मजूगु दुसा प्रेस काउन्सिल मार्फत उकिया उपचार मालेमाः धयादीगु दु ।

उकथं हे प्रेस सेन्टरपाखें नं म्हिगः छगू विज्ञप्ति पिकासें समाचारय् पिहां वःगु सामग्रीया आधारय् सञ्चार माध्यमयात फौजदारी मुद्दा लगे यायेगु धइगु कल्पना तकं याये मफइगु खँ खः धाःगु दु । अथे हे ‘सिधाकुरा’ पाखें प्रशारण हे मयाःनिगु सामग्री तकं प्रशारण याये दइ मखु धकाः रोके यायेगु नं सम्पादकीय स्वतन्त्रताय् तप्यंक हस्तक्षेप खः धासें उकिया नं विरोध याःगु दु ।

सर्वोच्च अदालतं नकतिनि ‘सिधाकुरा’ य् प्रकाशित समाचार भ्रामक व अदालतया जनआस्थाय् लिच्वः लाकी कथंया जूगु धासें सर्वोच्च अदालतया सहप्रवक्ता गोविन्द घिमिरें तयार याःगु प्रतिवेदनया आधारय् न्यायाधीशपिं नहकुल सुवेदी व टेकप्रसाद ढुंगानां उगु आदेश बिउगु खः ।

अख्तियारं याइगु स्टिङ अपरेसन सम्बन्धी नियमावली खारेज यायेगु फैसलायात हे प्रभावित जुइकथं सिधाकुरा डटकमं ‘डार्क फाइल’ शीर्षकया समाचार प्रकाशन याना वयाच्वंगु खः । उगु समाचारया सत्यतथ्य व प्राविधिक पक्षया अनुसन्धान यायेत अदालतं प्रहरी महानिरीक्षकयात नं आदेश बिउगु खः ।

सिधाकुरा डटकमं प्रसारण याःगु ‘प्यसः स्वयां अप्वः भ्रष्टाचार मुद्दा डिसमिस याकेगु सर्वोच्चया न्यायाधीश दुथ्याःगु बैठकया स्टिङ अपरेशन’ शीर्षकया समाचार नीप्यघौया दुने चीकेत नं आदेश बिउगु दु ।
आः थ्व बारे वइगु फलोअप सामग्री समेत प्रकाशन मयायेत नं अदालतं आदेश बिउगु दुसा थम्हं प्रकाशन याःगु सामग्री सत्यतथ्य खः धइगु प्रमाणसहित थ्वहे वइगु वैशाख २० गते सुथय् १० बजे बयानया नितिं अदालतय् उपस्थित जू वा धकाः नं सिधाकुराया प्रकाशक युवराज कँडेल व सम्पादक नवीन ढुंगानायात इजलासं आदेश बिउगु दु ।

सर्वोच्च अदालतया न्यायाधीश–तय्त समेत लाञ्छना बियाः उकथंया समाचार प्रकाशित यात धकाः तप्यंक सर्वोच्च अदालतं हे सम्बन्धित पत्रकारतय्त फौजदारी मुद्दा तयाः सजाय बीगु थ्यंकया आसय तयाः प्रक्रिया न्ह्याकूगु धासें पत्रकार जगत आक्रोशित जूगु खः ।

थ्वहे झ्वलय् प्रेस चौतारीपाखें नं म्हिगः छगू वक्तव्य पित बिसें सर्वोच्च अदालतं याःगु थज्याःगु फैसलां प्रेस स्वतन्त्रतायात हाथ्या बिउगु जूगुलिं थज्याःगु पलाःपाखें सर्वोच्च लिचिलेमाः धकाः माग यानातःगु दु ।
छुं नं सञ्चार माध्यमं प्रशारण याःगु समाचार सामग्रीयात कयाः सुयातं छुं चित्त बुझे मजूगु खँ दुसा उकियात कयाः उजुरी तयेगु थाय् प्रेस काउन्सिल दुगु जुयाः थुकिया बारे नं छानबिन यानाः आवश्यक सजाय बीकेगु ज्या प्रेस काउन्सिलयात हे याकेत नं सञ्चार माध्यमतय्सं इनाप याःगु दु ।

सञ्चार माध्यमय् पिहां वइगु छुं नं सामग्रीया बारे सत्यतथ्य छानबिन यायेगु थःगु हे विधि व तरिका दुगु व उकियात नं कानुनं हे सुस्पष्ट यानातःगु जुयाः सर्वोच्च अदालतं थ्व कानुनयात नं पालना यायेमाःगु जिकिर पत्रकार ख्यलं याना हःगु दु । थ्व मुद्दां यानाः सञ्चार ख्यः व अदालतया दथुइ तनाव सिर्जना जुइगु स्थिति पिहां वःगु दु ।