नेवाः अर्गनाइजेसन अफ न्यू इंग्ल्याण्ड बोस्टनय् मंकाः म्हपुजा

येँ – नेवाः अर्गनाइजेसन अफ न्यू इंग्ल्याण्ड बोस्टनया ग्वसालय् न्हूदँ नेपाल संवत् ११४० या लसताय् भिंतुना कलाबिललिसें म्हपुजा ज्याझ्वः जुल । ने.सं. ११४० कछलाथ्व पारुकुन्हु जूगु म्हपुजा ज्याझ्वलय् न्हूदँया लसताय् भिंतुना कालबिल नं जूगु खः । परम्परागत ज्वलं छ्यलाः मन्दः च्वयाः याःगु म्हपुजाय् गुरु मन्दःयात विधिपूर्वक पुजा यानाः म्हपुजा याःगु खः ।

सछिम्हं मल्याक मनूतय् सहभागिता दुगु म्हपुजाय् सगं बियाः नेवाः परम्पराकथं भ्वय् नकेगु ज्या जूगु खःसा म्हपुजा सिधयेवं ने.सं. ११४० न्हूदँयात लसकुस यासे भिंतुना कालबिल ज्याझ्वः जूगु खः । म्हपुजा याये न्ह्यः नेपाल संवत् व थुकिया महत्व बारे जानकारी बीगु ज्या जूगु खःसा वयां लिपा गुरुजु समन्तश्रीरत्न वज्राचार्यपाखें गुरुमन्दः पुजा यासें विधिपूर्वक म्हपुजा याःगु खः ।

‘अतिकं व्यस्तताया दथुइ नं आपालं मनूतय् सहभागिता दुगु तसकं लसताया खँ खः’ ग्वसाः खलःया छम्ह दुजःतकं जुयादीम्ह गुरुजु समन्तश्रीं धयादिल, ‘थःगु देशं तापाक च्वनाः नं थःगु भाषा, कला, संस्कृतिया प्रवद्र्धन व थुकियात माया मतिना याइपिं छगू हे थासय् मुनाः थुकथंया ज्याझ्वः यानागु मेगु लसताया खँ खः ।’