महानगरपालिकां हैसियतकथं ज्या यानाच्वंगु मदु ः पूर्व मेयर शाक्य

येँ(नेपालभाषा टाइम्स)÷येँ महानगरपालिकाया पुलांम्ह प्रमुख विद्यासुन्दर शाक्यं येँ महानरपालिकां थःगु हैसियतकथं ज्या याये मफुगु खँ धयादीगु दु । थःगु हैसियतकथं ज्या याये मफगुलिं येँ महानगरपालिकाया स्तर गुलि थहां वने माःगु खः अथे मजुसे अःखबतं कुहां वनाच्वंगु धयादीगु दु ।

थः मेयर जुयाच्वनागु इलय् सरकारं येँ महानगरपालिकाया हैसियत गुंगूगु थासय् तयातःगु खःसा आः वयाः महानगरं थःगु हैसियतकथं ज्या याये मफुगुलिं हे झिंन्हय्गूगु थासय् थ्यंगु नं जिकिर यानादीगु दु ।
येँ महानगरया पुलांम्ह प्रमुख शाक्यं उगु खँ नेपाल खेलकुद महासंघ येँपाखें ग्वसाः ग्वःगु छगू ज्याझ्वलय् धयादीगु खः । महासंघपाखें ग्वसाः ग्वःगु वृक्षारोपण ज्याझ्वलय् नवासें पुलांम्ह महानगर प्रमुख शाक्यं थौंकन्हय् येँ महानगरपालिकां स्थानीयवासी (महानगरवासी)या इच्छा अःखः ज्या यानाच्वंगु धासें महानगरपालिकां थःगु हैसियतकथं ज्या मयाःगुलिं हे झिंन्हय्गूगु थासय् थ्यंगु खः धयादिल ।

पुलांम्ह महानगर प्रमुख शाक्यं येँ महानगरया वर्तमान प्रमुख बालेन्द्र साह (बालेन)यात लक्षित यासें धरहरा थुना बीगु, सिंहदरवार च्याका बीगुलिसें थीथी अवाञ्छित व आपत्तिजनक अभिव्यक्ति बीगु ज्या यानाच्वंगुयात कयाः नं आपत्ति प्वंकादिल । लिसें वय्कलं प्रमुख साह ज्या यायेगु थासय् वनाः नं ज्या छुं मयायेगु तर मेपिंत ब्वः बियाः उकिया जस थम्हं कायेगु ज्या जक यानाच्वंगु नं जिकिर यानादिल ।
थः मेयर जुयाच्वनागु इलय् आपालं बांलाःगु ज्या यानागु खँ न्ह्यथनादिसें थ्व हे कारणं सरकारं महानगरपालिकाया हैसियत गुंगूगु थासय् तःगु खः धयादिल । न्हूसतक लागाया फुटपाथ तब्या यायेगु योजना स्थानीयया इच्छा अःखः यानाच्वंगु धासें वय्कलं न्हूसतकय् फुटपाथ तब्या यायेत नगर प्रहरीया बल छ्यलाः जनप्रतिनिधियात क्वत्यलेगु ज्या यानाच्वंगु द्वपं बियादिल ।

‘वय्कः (नगर प्रमुख साहं) जनप्रतिनिधियात सतकय् कुहां वयेत बाध्य यानाः नगर प्रहरीयात कथि ज्वंकेगु ज्या यानाच्वंगु दु, ‘ पुलांम्ह नगर प्रमुख शाक्यं धयादिल, ‘नगर प्रहरीया लिधंसाय् जुयाच्वंगु गुण्डागर्दी सह याये फइगु खँ मखु ।’

वय्कलं सत्ताय् दुपिं थःपिं न्ह्यइपुकेगु निंतिं मखसे भावि पुस्तायात लय्तायेकेगु निंतिं महानगरपालिकां म्हइगु करया सही सदुपयोग यायेमाःगु नं धयादीगु दु ।