राजमतिया नेपाली भर्सन पिदन
येँ (नेपालभाषा टाइम्स)÷ नेपाःया सांगितिक संसारय् निसत्या दँ न्ह्यःनिसें ा ऐतिहासिक रुपं लोकंह्वाना म्ये पुस्तान्तरण जुया वःगु व थ्यंमथ्यं ११५ दँ न्ह्यः भारतया कोलकत्ताय् सेतुरामया सलय् रेकर्ड याःगु ‘राजमती’यात खस् नेपाली भाषाय् पुनर्लेखन, संगीत व एरेन्ज यानाः तयार याःगु खः । ‘राजमती’या नेपाली भर्सन म्येया म्युजिक भिडियोया पितब्वज्या वंगु बुधवाः ख्यालिजुजु नांजाःम्ह कलाकार मदनकृष्ण श्रेष्ठं यानादिल ।
ज्याझ्वलय् आदी गायक सेतुराम प्रधानया बारे डकुमेण्ट्री नं पितब्वज्या याःगु खःसा सेतुरामया परिवारयात सम्मान याःगु खः । उगु हे ज्याझ्वलय् सिनेमाख्यःया न्ह्यलुवा पत्रकार बिजयरत्न तुलाधरयात राष्ट्रिय पत्रकारिता पुरस्कार व व्यवसायी फुपु तेञ्जिङ्ग शेर्पायात राष्ट्रिय युवा उद्यमी सम्मानपाखें सम्मानित याःगु खः ।
आदीगायकया रुपय् इतिहासं दयेकूम्ह गायक सेतुराम प्रधानं बि.सं. १९६५ पाखे भारतया कोलकत्ताय् ‘राजमती’सहित खस नेपाली व नेपाल भाषाया १४ पु म्ये ग्रामोफोन डिस्कय् रेकर्ड याकूगु खः । ग्रामोफोन डिस्कय् रेकर्ड जूगु नेपाःया थ्वहे न्हापांगु म्ये खः । थ्वहे म्येया नेपाली भर्सनया निंतिं गीतकार कृष्णदेव रिमालं भाषा सम्पादन यानादीगु खःसा गायक कृष्ण काफ्लें हालादीगु थ्व म्येया निंतिं सन्तोष श्रेष्ठं संगीत संयोजन यानादीगु खः ।
निसत्या दँ न्ह्यः राणा प्रधानमन्त्री जंगबहादुर बेलायत भ्रमणय् वंगु इलय् राजमति म्येयात नेपाःया राष्ट्र गानया रुपय् न्ह्यब्वसांनिसें आःतक उतिकं हे लोकंह्वाना वया च्वंगु थ्व म्येया नेपाली भर्सन पिहां वःगुलिं ख्यालिजुजु मदनकृष्ण श्रेष्ठं लसता प्वंकादिसे मेमेगु भासं नं थ्व म्ये पिकायेदःसा जिउ धयादिल ।
निर्माता कम्पनी ड्रिम वल्र्ड अफ फिल्म मेकर्सया कजि शबनम मुखियाया सभापतित्वय् जूगु उगु ज्याझ्वलय् सेतुरामया परिवारपाखें मदन प्रधान, सम्मानित विजयरत्न असंबरे, राजमति संकिपाया नकिं हिसिला महर्जनपिंसं नुगःखँ तयादीगु खः ।
थ्व म्येया संकिपाय् सागर खनाल, सोनी लगुन, प्रभातकुमार खेँ, पवन केसि, प्रतीक्षा शाह, संगीत अधिकारीलगायत आपालं कलाकारपिंसं अभिनय यानादीगु दु । दिपक बज्राचार्यं छायाँकन यानादीगु थ्व भिडियोया परिकल्पना व निर्देशन सबनम मुखिया व निर्माण रश्मी प्याकुरेलं यानादीगु खः ।
LEAVE YOUR COMMENTS