च्याम्पियन्स लिग बार्सिलोना शीर्षस्थानय्

लियोनल मेसी च्याम्पियन्स लिगया झ्वःलाक्क झिंन्यागू कासाय् गोल याःम्ह न्हापांम्ह कासामि जूगु दु । बुधवाः चान्हय् जूगु कासाय् बार्सिलोनां स्लाभिया प्रागयात २–१ गोलं बुकेगु झ्वलय् मेसीं थ्व कीर्तिमान तःगु खः । कासाया स्वंगूगु मिनेटय् हे मेसीं गोल यासें बार्सिलोनायात अग्रता बिउगु खः ।

चेक च्याम्पियन स्लाभिया प्रागया निंतिं कासाया ५० औं मिनेटय् जान बोरिलं गोल यासें कासा बराबरीइ हःगु खः, तर थ्वयां न्हय्ग मिनेट लिपा हे स्लाभियाया पेटर ओलायिन्कां आत्मघाती गोल यानाबिइवं बार्सां विजय चूलाकूगु खः । कासाया ५७ औं मिनेटय् मेसीं थ्वाःगु फ्रिकिकय् वःगु पास लुइस स्वारेजं पोस्टपाखे थ्वाःगु खः, तर उगु बल ओलायिन्काया तुतिइ लानाः आत्मघाती गोल जूगु खः ।

थ्व विजय लिपा ला लिगाय् शीर्षस्थानय् लानाच्वंगु बार्सिलोनां फुक्क कथंया धेंधेंबल्लाखय् झ्वःलाक खुगू कासा त्याकूगु दु । थ्व विजय लिपा बार्सा च्याम्पियन्स लिगया समूह एफय् नं ७ अंक कयाः शीर्षस्थानय् थ्यंगु दु । बार्सा इन्टरमिलान व बोरुसिया डर्टमन्ड स्वयां ३ अंकं च्वय् दु ।

सम्बन्धित बुखँ

LEAVE YOUR COMMENTS