एसिसि प्रिमियरकपया फाइनलया ल्यं दनिगु कासा मंगलवाः न्ह्याइगु
येँ (नेपालभाषा टाइम्स)- टियु क्रिकेट मैदानय् जुयाच्वंगु एसिसि प्रिमियरकपया फाइनलया ल्यं दनिगु कासा थौं मंगलवाः जुइगु जूगु दु । नेपाः व युएइ दथुइ जुयाच्वंगु फाइनल कासा सोमवाः वा वयाः दिकेमाःगुलिं थौं हाकनं कासा जुइगु जूगु खः ।
सोमवाः युएई न्हापां ब्याटिङ यासें २७.३ ओभरय् ९ विकेटया क्षतिइ १०६ रन दयेकूगु स्थितिइ कासा दिकेमाःगु खः । कासा दिकेधुंकाः नं लगातार वा वयाच्वंगुलिं ल्यंदनिगु कासा थौं जुइत्यंगु खः । थौं जुइगु कासा म्हिगः गन दिउगु खः अनं निसें, अथे धयागु ९ विकेट वनेधुंकूगु अवस्थाय् युएर्इं हे ब्याटिङ यानाः न्ह्याइ । यदि मौसम बांमलानाः थौं नं नेपालं ५० ओभर म्हितेमखनीगु जुल धाःसा कासाया ओभरय् क्वकयाः डकवर्थ लुइस नियम कथं त्याःबूया निर्णय याइगु जुइ ।
ओभर म्हो यानाः नं म्हितेफइगु अवस्था मजुल धाःसा कासा सुपरओभरय् वनी । यदि सुपरओभरय् नं म्हितेफइगु अवस्था मजुल धाःसा एकदिवसीय वरियताया आधारय् त्याबू निर्णय याइगु जुइ । यदि थुकथं कासाया निर्णय यायेमाल धाःसा नेपाः स्वतः त्याइगु जुइ । छाय्धाःसां एकदिवसिय वरियताय् नेपाः युएई स्वयां न्ह्यःने दु । नेपाः १४ औं वरियताय् दुसा युएई १९ औं वरियताय् दु ।
एसिसिइ प्रिमियर कपया विजयी टिम एशिया कपया निंतिं स्वतः छनोट जुइ । पाकिस्तानय् जुइगु थ्व धेंधेंबल्लाःया समूह एय् भारत, पाकिस्तान दुसा एसिसि प्रिमियर कप त्याकाः वःगु टिम नं थ्व हे पुचलय् लाइ । समूह बीइ श्रीलंका, बंगलादेश व अफगानिस्तान दु ।
सोमवाः जूगु कासाय् नेपाःया निंतिं ललितनारायण राजवंशीं स्वंगू विकेट काःगु खःसा सन्दीप लामिछाने व करण केसीं निगू निगू विकेट काःगु दु, अथेहे सोमपाल कामी व गुल्सन झां छगू छगू विकेट काःगु दु । युएईया निंतिं आसिफ खानं दकलय् अप्वः ४६ रन दयेकूगु खः ।
LEAVE YOUR COMMENTS