फुटबलय् नेपाः फाइनललिक्क, भूटान फाइनलय्

तेजनारायण महर्जन

झिंस्वक्वःगु दक्षिण एशियाली कासा (साग)या मिजंतय् फुटबलय् नेपाः फाइनलया लिक्क थ्यंगु दुसा भूटान फाइनलय् थ्यंगु दु । शनिवाः जूगु कासाय् श्रीलंकायात ३–० गोलं बुकुसें भूटान फाइनलय् दुहां वंगु खः । थ्वयां न्ह्यवया कासाय् ने पालं माल्दिभ्सयात २–१ गो लं बुकूगु खः । थ्व विजय लिपा नेपाः नंफाइनल लिक्क थ्यंगु दु । नेपाःयात फाइनलय् वनेगु निंतिं थौं जुइगु कासाय् बंगलादेशलिसे बराबरी जक याःसां गाः ।

शनिवाः श्रीलंकायात बुके वं भुटान लिग चरणय् छगुली पराजय व स्वंगू कासा त्याका ९ अंक सहित शीर्षथासय् दु । माल्दिभ्सयात बुकूगु ने पाःया ७ अंक दुसा बंगलादेशया ४ अंक दु । थौं जुइगु कासाय् बंगलादेशं ने पाःयात बुकल धाःसा निगुलिं टिमया ७–७ अंक जुइ । थ्व अवस्थाय् गो लअन्तर या ल्याखं नेपाः हे फाइनलय् वनीगु सम्भावना यक्व दु ।

शनिवाः जूगु कासाय् माल्दिभ्सं दकलय् न्हापां अग्रता काःगु खः । कासाया १८ औं मिनेटय् इब्राहिम महुदी हुसैनं गो ल यास ं माल्दिभ्सयात अग्रता बिउगु खः । तर कासाया न्हापांगु हाफ क्वचायेत निगू मिनेट ल्यं दनिबलय् अभिषेक रिजालं उत्कृष्ट गोल यासें कासा बराबरीइ हल । रिजालं पेनाल्टिया पिनेसं वःगु बलयात बांलाक नियन्त्रणय् कयाः थ्वाःगु बल गोलय् परिणत जूगु खः ।

न्हापांगु हाफ बराबरीइ क्वचाःगु खःसा लिपांगु हाफ सुरु जूगुया न्हय्गू मिनेट दुने नेपालं अग्रता काल । कासाया ५२ औं मिनेटय् नेपाःयात वःगु कर्नरय् अनन्त तामाङं हेडपाखें गोल याःगु खः । थ्व हे गोल नेपाःया निंतिं विजयी गोल नं जुयाबिल । माल्दिभ्स विरुद्धया कासाय् नं ने पालं उत्कृष्ट प्रदर्शन याःगु खः । कासाया झिगूगु मिनेटय् हे कप्तान सुजल श्रेष्ठं उत्कृष्ट प्रहार याःगु खः, तर बल पोलय् न्यानाः लिहां वन । थ्वयां लिपा २७ औं मिनेटय् वःगु कर्नरय् नं अनन्तं बांलाःगु हेड याःगु खः, उगु बल गोलकिपरयात पार याना वंगु खःसां मेम्ह कासामिं क्लियर यानाबिल ।

सम्बन्धित बुखँ

LEAVE YOUR COMMENTS