स्वन्तियात २५ लाख स्वांमाःया माग

येँ – थुगुसी स्वन्तिबलय् थगुने स्वयां च्यागू लाख अप्वः स्वांमाः खपट जुइगु अनुमान दु । थगुने स्वन्तिबलय् १७ लाख स्वांमाः खपट जूगु खःसा थुगुसी २५ लाख स्वांमाःया माग दुगु खँ धाःगु दु । बजारय् स्वांया माग अप्वःसां स्वदेशय् हे उत्पादन बांलाःगुलिं आयात धाःसा म्हो जक जुइगु खँ नं धाःगु दु ।

विशेष यानाः स्वन्तिबलय् छ्यलीगु तफ्वः स्वां, ग्वय्स्वां, गोदावरी स्वां मध्ये तफ्वःस्वां जक भारतं हयेमाःगु अवस्था दुगु खँ धाःगु दु । थुगुसी खपट जुइगु स्वांमाः मध्ये निगू लाख ५० हजार माः जक भारतं हयेगु व ल्यं स्वदेशी उत्पादनं हे गाइगु खँ नं धाःगु दु । थुगुनेया तुलनाय् थुगुसी ठीक इलय् स्वन्ति लाःगु दु ।

गुकिं यानाः स्थानीय स्वां ह्वयेधुंकूगु व उपिं फुक्कं स्वन्तिबलय् छ्यलेफइगु जुयाच्वंगु दु । व्यवसायीतय्सं थ्व दँया पात्रो स्वयां हे व्यावसायिक रुपं स्वां पिउगु खः । थ्व दाय् उपभोक्तातय्सं तफ्वःस्वां छमाःया ६० निसें ७० तका तक पुलेमालीगु जुइ । थगुने ५० निसें ६० तका तक तूगु खँ फ्लोरिकल्चर एशोसियसनया अध्यक्ष कुमार कसजु श्रेष्ठं कनादीगु दु ।

दँय् दसं १० निसें १५ प्रतिशत स्वदेशी स्वांया उत्पादन अप्वया वनाच्वंसां माग अप्वया वनाच्वंगु छुं स्वांमाः भारतं हयेमाःगु अवस्था दुगु खः । स्वन्तिबलय् जक १५ करोडया स्वां कारोवार जुइगु जुयाच्वंगु दु । ‘थ्वपालय् स्वन्तिबलय् भारतं तसकं म्हो जक भावं स्वां आयात यायेगु तयारी जुयाच्वंसां माग अप्वःगुलिं स्वांमाः भचा आयात यायेमालीगु खनेदु’ वय्कलं धयादिल ।

‘थौंकन्हय् स्वदेशय् मागया ९३ प्रतिशत स्वां उत्पादन जुइधुंकूगुलिं ७ प्रतिशत जक भारतं हयेगु बाध्यता दु’ वय्कलं धयादिल । थ्वयां न्ह्यवः १० प्रतिशत स्वां भारतं आयात यायेमालाच्वंगु खः । नेपालय् खपट जुइगु स्वांमाः मध्ये दकलय् अप्वः ६० प्रतिशत स्वांमाः स्वनिगलय् हे खपट जुइगु जुयाच्वंगु दु ।

स्वदेश व विदेशय् यानाः थौंकन्हय् दँय् निगू अर्ब ४२ करोड तकाया स्वां कारावार जुइगु जुयाच्वंगु दु । स्वन्ति व मेमेगु मौसमय् यानाः ११ करोड बराबरया स्वां वार्षिक रुपं विदेशं आयात यानाच्वंगु दु । विशेष यानाः कात्तिक निसें फागुन तक थीथी नखःचखः व इहिपाया मौसम लाःगुलिं स्वांया अप्वः छ्यलाबुला जुइ ।

स्वन्तिबलय् तफ्वःस्वां व भ्यालेन्टाइन डेबलय् ह्याउँगु गुलाब आयात यायेमाःसां ग्वय् स्वां, गोदावरी स्वां नेपालय् हे आत्मनिर्भर जुइधुंकूगु दु । अष्टे«लिया व मलेसियाय् यक्व नेपालीत दुगुलिं स्वन्तिबलय् उगु देशय् नं ग्वय्स्वां निर्यात जुइगु जुयाच्वंगु खँ अध्यक्ष श्रेष्ठं कनादिल ।

व्यावसायिक रुपं ४५० ताजि स्वां नेपालय् उत्पादन जुयाच्वंगु दु । थ्व व्यवसायपाखें ४१ हजार स्वायं अप्वm मनूतय्सं प्रत्यक्ष वा अप्रत्यक्ष रुपं लाभ कयाच्वंगु दु । नेपालय् थ्यंमथ्यं १५७ हेक्टर क्षेत्रफलय् न्हयसःम्ह व्यावसायीतय्सं व्यावसायिक स्वां खेती याना वयाच्वंगु दु ।

सम्बन्धित बुखँ

LEAVE YOUR COMMENTS