क्यानडाय् येँयाः नखः हनीगु

येँ(नेपालभाषा टाइम्स)- क्यानेडियन नेवाः गुथिं दँय्दसं थें थुगुसी नं तःजिब येँयाः नखः हनीगु जूगु दु । गुथिं थुगुसी नं येँयाः नखःया इलय् ‘समय्बजि’ ज्याझ्वःलिसें विशेष आकर्षणकथं थीथी सांस्कृतिक ज्याझ्वः याइगु जूगु दु ।
गुथिं थुगुसी ‘ब्रिजिङ जनेरेसन विथ समय्बजि’ नारा बियाः येँयाः नखः हनेत्यंगु दु । वइगु सेप्टेम्बर ७ शनिवाःकुन्हु ब्राप्टन सहरय् च्वंगु चिङ्कुजि पार्कय् येँयाः नखःया लसताय् विशेष ज्याझ्वः याइगु जूगु दु ।

ज्याझ्वलय् न्हापा लिपा थें लाखेप्याखं, कुमारि, चचा प्याखंलिसें धिमे बाजं व नेवाः लोक प्याखंयात निरन्तरता बीगु नापं थुगुसी विशेष आकर्षणया रुपय् ‘पुलुकिसि प्याखं’, ‘हाथ्वँ हायेकेगु’ ज्याझ्वः दुथ्याइगु गुथिया न्वकु सुरेन्द्रलाल श्रेष्ठं जानकारी बियादीगु दु ।

येँयाः नखः ज्याझ्वःया कजि तकं जुयादीम्ह श्रेष्ठं थुगुसी नेवाः कला, संस्कृति सम्बन्धी मंकाः न्ह्यसः लिसः कासा, नेवाः समुदाय दुने म्हितीगु थीथी परम्परागत, मौलिक कासाया नं प्रस्तुति दइगु जानकारी बियादीगु दु ।
सन् २००५ य् नीस्वंगु क्यानेडियन नेवाः गुथिं नेवाः कला, संस्कृति, भाषा, प्रवद्र्धन, संरक्षण यायेगु नापं न्हू पुस्तायात थुकिया जानकारी बीगु ताःतयाः निरन्तर रुपं थीथी ज्याझ्वः याना वयाच्वंगु दु ।