ने. सं. ११४३ चौलाथ्व तृतीया -

छत्रपाटी चिकित्सालयया स्वर्ण महोत्सव भवनय् लिफ्टया उलेज्या

येँ- छत्रपाटी निःशुल्क चिकित्सालय (अस्पतालया) ६४ क्वःगु साधारण सभा म्हिगः छगू ज्याझ्वःया दथुइ क्वचाल ।
येँ महानगरपालिकाया मेयर विद्यासुन्दर शाक्य मूपाहाँ कथं झायायादीगु उगु ज्याझ्वलय् चिकित्सालयया स्वर्ण महोत्सव भवनय् च्वंगु लिफ्टया उलेज्या मूपाहां शाक्यं रिवन चानाः यानादिल ।

चिकित्सालयया अध्यक्ष डा. मनोजमान श्रेष्ठया सभापतित्वय् न्ह्यागु उगु ज्याझ्वलय् मूपाहां शाक्यपाखें चिकित्सालयय् २५ दँ तक सेवायानादीपिं डा. चन्द्रलक्ष्मी श्रेष्ठ, हेमा लामा, २० दँ तक सेवा यानादीपिं चन्द्रलक्ष्मी श्रेष्ठ, ससिता मानन्धर, रेणु पोखरेल, १० दँ तक सेवा यानादीपिं डा. दुर्गा शाक्य, डा. अनिल शाक्य, नरिमाया बस्नेत, जुनु दर्नाल, रिना पोडे अथे हे २५ दँ तक सेवा बियाः राजिनामा बियादीपिं चिकित्सक व कर्मचारीपिं डा. विजयबहादुर राजण्डारी, डा. केशवराज भट्टराई, मिखा सहायक मोतीबहादुर थापायात हनेज्या नं यानादीगु खः ।

ज्याझ्वलय् चिकित्सालयात कोभिडया इलय् विशेष ग्वाहालि यानादीपिं दया फाउण्डेशन, सोनाम गियर, अरनिको समाज, महाविर पुन, स्वस्तिक गुरुकुल, डा. बालकृष्ण श्रेष्ठ, डोल्मा शेर्पा, सावित्री पुजारी, खड्गबहादुर थापा, चमेलि गुरुङ, श्यामबहादुर शाह, अन्जु राजोपाध्याय, कमलबहादुर खड्का, समिर वज्राचार्य, लोकेन्द्रराज विष्ट, प्रस्तुति तथा निःसन्तान रोग विशेषज्ञ डा. भावा मल्ल श्रेष्ठ, व दिपककुमार श्रेष्ठपिंत सम्मान यायेगु ज्या जूगु खः । अथे हे ज्याझ्वलय् ‘माउ बद्री भवन’या निंतिं आर्थिक ग्वाहालि यानादीपिं सानी कपाली व कृष्णगोपाल रंजितयात मेयर शाक्यं दोसल्ला न्ययेकाः सम्मान यानादिल ।

ज्याझ्वलय्् चिकित्सालयया उपाध्यक्ष कुमारदेव मानन्धरं लसकुस यानादीगु खःसा महासचिव राजेन्द्रप्रसाद मानन्धरं सुभाय् बिउसें सभा क्वचायेकेगु ज्या जूगु खः ।