राष्ट्रपति–प्रधानमन्त्री हानं टक्कर

येँ- शेरबहादुर देउवां याना छ्वःगु मेगु छगू सिफारिस राष्ट्रपतिं पनीगु सम्भावना ब्वलंगु दु । प्रम देउवां राष्ट्रिय सभाय् मनोनित जुइपिं धकाः सिफारिस याना छ्वःगु स्वम्हेसिगु नां राष्ट्रपति कार्यालयं पनीगु संकेत खने दया वःगु खः ।

प्रम देउवाया सरकारं कुर्सी त्वःतेगु अन्तिम इलय् वयाः राष्ट्रिय सभाय् वनीपिं स्वम्ह मनूया सिफारिस याःगुली राष्ट्रपति भवनं थ्व स्वम्ह सांसदया नां वनेत्यंम्ह सरकारं सिफारिस याइगु खः लाकि न्हू वइम्ह सरकारं सिफारिस याइगु खः धइगु न्ह्यसः पिथंगु खँ सूत्रं धाःगु दु ।
उकिं थ्व नांयात स्वीकृत यायेगु लाकि मयायेगु धकाः राष्ट्रपतिपाखें परामर्श यायेत्यंगु खँ सीदुगु दु । थ्व परामर्श धुंकाः जक थ्व नांयात स्वीकृत यायेगु वा मयायेगु धकाः निर्णय याइगु सूत्रया दावी दु । तर परामर्श गबले याइ व गबले सिधयेकी धइगु खँ धाःसा धाःगु मदुनि ।

सरकारपाखें अन्तिम इलय् वयाः याःगु थ्व सिफारिस शनिवाः बिदाया न्हि कुन्हु लाकाः राष्ट्रपति भवनया मूलुखाय् पाः च्वनीम्ह सेनाया छम्ह जवानया ल्हातय् बुझे याना थकूगु खः । सरकारं थज्याःगु सिफारिस धइगु तप्यंक राष्ट्रपति कार्यालयय् दर्ता यायेमाःगु खः । राष्ट्रपति कार्यालयं उगु पौ आइतवाः तिनि थःपिनि ल्हातय् लाइगु व वयां लिपा जक उकिया बारे बिचाः याइगु खँ धाःगु दु ।

उखे सरकारं धाःसा प्रधानमन्त्रीं याइगु छुं नं सिफारिसयात राष्ट्रपतिं छुं हे अलमल मयासे स्वीकृत यायेमाः धासें उकी छुं हे कथंया परामर्श याना च्वनेम्वाःगु खँ धाःगु दु । राष्ट्रपतिं थ्व सिफारिस पना बिल धाःसा सरकार व राष्ट्रपति कार्यालय दथुइ हानं तनाव ब्वलनीगु खतरा समेत पिहां वःगु दु । छुं जुयाः राष्ट्रपतिं थ्व सिफारिस पना बिल धाःसा प्रधानमन्त्रीं न्हूगु सरकार गठन यायेगु ज्याय् अझ विलम्ब यानाबी फुगु खँ नं धाःगु दु ।

सिफारिसय् असन्तुष्टी
प्रधानमन्त्री शेरबहादुर देउवां राष्ट्रिय सभाया लागिं गोपाल बस्नेत, कृष्णप्रसाद पौडेल व चाँदनी जोशीया नां सिफारिस याःगु खः । बस्नेत वा पौडेल देउवाया सतीम्ह खःसा जोशी राप्रपाया कोटां सिफारिस जूम्ह खः । प्रम देउवां याःगु थ्व सिफारिसयात कयाः पार्टीया रामचन्द्र पौडेल पक्षं असन्तुष्टि प्वंकाच्वंगु दुसा संसफो व राजपां नं थःपिंलिसे परामर्श मयासे नां सिफारिस यात धकाः तं प्वंकाच्वंगु दु । थुकियात एमाले व माओवादीं नं विरोध याःगु दु ।