थौंया चुनौति !
थौं भूमण्डलीकरणया युग । आधुनिक प्रविधिया विकासं संचार, यातायातया ख्यलय् अभूतपूर्व हिउपाः वःगु खनेदइ । विश्व स्वयम चीधं जुया वनी । विश्वया मनूतय् दथुइ अन्तर सम्बन्ध व अन्तर निर्भरता वृद्धि जुइ । विश्व व्यापार, आर्थिक गतिविधिया चौतर्फि विस्तारं विश्व मानवतय् स्वापू बहुआयामि जुयाः खनेदइ ।
अनेक कारणवश थौंकन्हय् छगू देय्या मनूत मेमेगु देशय् वनेगु चलन अप्वया च्वंगु दु । विशेष यानाः अल्पविकसित देय्या मनूत थःगु लजगाः व वृत्ति विकासया निंतिं विकसित व आर्थिक लाभया सम्भावना दुगु देशय् वनी । विश्वव्यापी रुपय् खने दयाच्वंगु निकटता विश्वव्यापीकरणया गतिइ न्हियान्हिथं तीव्र जुया वनी ।
इलं हःगु थ्व विश्वव्यापीकरणया लहरयात पने फइमखु । थुकिया प्रभावं विश्वया गुगुं नं देय् थौं तापाक च्वने फइमखु । छन्हु न्हापा वा छन्हु लिपा जूसां भूमण्डलीकरणं संसारन्यंकं हे प्रभाव याइ । विश्वव्यापीकरणया प्रभावं तापाक च्वनेत थौं गुगुं राष्ट्रयात नं सम्भव जुइमखु, तर विश्वव्यापीकरण गुलि लाभदायक थुखेपाखे नं थौं मनूत गम्भिर जुया वयाच्वंगु दु ।
भूमण्डलीकरणया तीव्र प्रभावं थौं थीथी देय्या मनूतय् जीवनय् छुं छुं सकारात्मक प्रभाव लाःसां विश्वया प्रत्येक देय्या राष्ट्रिय, क्षेत्रीय, स्थानीय विशेषता, पहिचानयात थ्वं प्रतिकूल प्रभाव लाकूगु दु ।
भूमण्डलीकरणया तीव्र प्रभावं थौं थीथी देय्या मनूतय् जीवनय् छुं छुं सकारात्मक प्रभाव लाःसां विश्वया प्रत्येक देय्या राष्ट्रिय, क्षेत्रीय, स्थानीय विशेषता, पहिचानयात थ्वं प्रतिकूल प्रभाव लाकूगु दु । प्रत्येक देय्, राष्ट्रया थःथःगु राष्ट्रिय संस्कृति, कला, इतिहास दयाच्वनी । छगू हे देय्या नं विविध संस्कृति, भाषा, कला, सम्पदा दयाच्वनी ।
प्रत्येक देय्या थःथःगु राष्ट्रिय गौरव पहिचान दयाच्वनी । तर भूमण्डलीकरणया कारणं थौं थीथी देशं थःगु मौलिक, पहिचान, संस्कृति, असीमित संकटय् लाःगु अनुभव याये मालाच्वंगु दु । पिनें भूमण्डलीकरण धाःसां भूमण्डलीकरण थौं खास विश्वया शक्तिशाली देय्तय् चंगुलिय् लाइ । विश्वया शक्तिशाली बहुराष्ट्रिय व्यापारीतय् व्यापारिक नियन्त्रण, हालिमुहालिया ज्याभः जुइ ।
निश्चित देय्तसें विश्वन्यंकं थःगु सांस्कृतिक, आर्थिक प्रभाव न्यंकेगु अस्त्रकथं थौं भूमण्डलीकरण न्ह्याकी । भूमण्डलीकरणयात थौं मेगु अर्थय् विश्वया एकमुष्ट पूँजीपतितसें विश्वय् आर्थिक साम्राज्या स्थापना यायेगु चाल खंकी । थौं भूमण्डलीकरणया नामय् विश्व संस्कृति पश्चिमाकरण जुयाः वयाच्वंगु दु ।
भूमण्डलीकरणं विश्वया प्रत्येक राष्ट्रयात स्वतन्त्र, समानकथं म्वाये दइगु न्यायोचित अवसर बी, विश्वया विविध पहिचान, विविध संस्कृति, कलायात म्वायेगु अवसर बी धइगु खँ थौं असम्भव जुइ । कारण थौं भूमण्डलीकरण विश्वया शक्तिशाली देय्तसें विश्वन्यंकं थःगु आर्थिक, सांस्कृतिक आधिपत्य कायम यायेगु चातुर्य जुयाः खने दइ ।
विश्वया विविध सांस्कृतिक सभ्यतायात भूमण्डलीकरणं तहसनहस यानाबी । विश्वया विविध देय् व असंख्य जनतायात आर्थिक निर्भरताया दास दयेका बी । आधुनिक युगया सत्यता खयां नं भूमण्डलीकरण थौं अनेक देय्तय् स्वतन्त्र पहिचान, अस्तित्वया निंतिं हे चिन्ताया विषय जुयाबी । ‘भूमण्डलस्तरय् चिन्तन या, तर थःगु कर्म स्थानीय नहय् सम्पन्न या ।
यायेत स्व ।’ थौं थज्याःगु धापू न्यने दइ । थुकिं हे भूमण्डलीकरणया खतराप्रति सचेत जुयाः थःगु संस्कृति, पहिचानप्रति प्रतिवद्ध जुइमाः धइगु सन्देश बी । मनूया नैसर्गिक स्वापू थःगु स्थानीयतालिसे दयाच्वनी । स्थानीयस्तरया मनू जीवन्त व सजीवय् आत्मनिर्भर जुइमाः । अले तिनि थःगु जीवनया सवाः काये फइ ।
थौं देशय् नयेगु, तीगु, पुनेगु, भाय्, शिक्षा, चिन्तन पद्धति भूमण्डलीकरणया प्रभावय् लाइ । लिच्वःकथं थःगु मौलिक पहिचानयात हीन खंका हइ । भूमण्डलीकरणं छुं छुं मिश्रित प्रभाव लाकी । तर भूमण्डलीकरणया अर्थ थौं पूर्ण विदेशीकरण व आर्थिक, सांस्कृतिक, साम्राज्यावाद जुयाः लुइ ।
अन्तर्राष्ट्रिय पूँजीवादीतय्सं विश्वया जनतायात उपभोक्तावादया जालं क्यंकाः अन्धाधुन्ध शोषणया शिकार खंकी । भूमण्डलीकरणया नामय् थौं विश्वया गरिब जनता, पीडित जुइ । भूमण्डलीकरणया कारणं थौं मनूतय् जीवन पद्धति तःधंगु हिउपाः खनेदइ । प्रत्येक देय्या मौलिक पहिचानयात थौं अस्तित्वया संकटय् लाइ । विश्वव्यापीकरणया ख्वाःपाः पुनाः आर्थिक, सांस्कृतिक, साम्राज्य स्थापना यायेगु महत्वकांक्षां देय्तय् चंगुलं गथे पिहां वयेगु ? बचे जुइगु ? थौंया चुनौति जुइ ।
LEAVE YOUR COMMENTS