ने. सं. ११४४ कौलाथ्व तृतीया -

रोजगार मेलाय् ५० म्हेसित रोजगारी

थिमि(नेपालभाषा टाइम्स)-मध्यपुर थिमि नगरपालिकाया ग्वसालय् वंगु शनिवाः जूगु रोजगार मेलाय् न्यय्म्हेसित रोजगारी बिउगु दु । नगरपालिकां वंगु शनिवाः पुलांगु थिमिया आदर्थ माध्यमिक विद्यालय प्रांगणय् ग्वसाः ग्वःगु ‘वृत्तिमार्ग निर्देशन तथा रोजगार मेला’पाखें न्यय्म्हेसिन रोजगारीया अवसर चूलाकूगु खः ।

मेला मूल आयोजक समितिया संयोजक लिसें नगरपालिकाया प्रवक्त कृष्णहरि आचार्यं थीथी संघसंस्था, उद्योग, व्यवसाय, रोजगारदाता कम्पनीं मेलाय् आवेदन बिउपिंमध्ये न्यय्म्हेसित रोजगारी मेलास्थलय् बिउगु जानकारी बियादिल ।

मेला अवलोकनया निंतिं वःपिं न्याद्वः स्वयां अप्वः ल्याय््म्ह व विद्यार्थीमध्ये प्रदर्शनी कक्षय् दुगु रोजगारदाता कम्पनीइ झण्डै न्यासलं रोजगारीया निंतिं आवेदन बिउगु वय्कलं कनादिल ।

मेलाय् प्रधानमन्त्री रोजगार कार्यक्रम, भक्तपुर चेम्बर अफ कमर्स, मध्यपुर उद्योग वाणिज्य संघ, इन्स्योर परियोजना, जिल्ला सहकारी सङ्घ ख्वप, प्याब्सन, पूर्ण हस्तकला संकलन, बालकुमारी महिला समाज मध्यपुर थिमि, रोजगारी सर्भिसेज प्रा.लिं विवरण संकलन यानाः रोजगारी चूलाका बिउगु खः । थुकीमध्ये दकलय् अप्वः प्याब्सन ख्वप जिल्लां पीछम्हेसित रोजगारीया अवसर बिउगु खः ।

थुकथं हे झिंखुसः स्वयां अप्वःसिनं वृत्ति मार्ग निर्देशन परामर्शय् परामर्श काःगु मेलाय् निजी उद्योड, संघसंस्था, प्राविधिक विद्यालय, नसा, स्वास्थ्य थीथी ख्यःया ३४ गू प्रदर्शनी कक्ष तयातःगु खः ।