गुथि आन्दोलन दच्छि पूवंगु न्हि लुमंकाः थीथी ज्याझ्वः

येँ – सरकारं गुथि विधेयक हःगु विरुद्ध नेवाःतय्सं बृहत्त प्रदर्शन याःगु दच्छि पूवंगु न्हियात लुमंकाः बिहीवाः स्वनिगलय् थीथी ज्याझ्वः याःगु दु ।

गुथि विधेयक मंकाः संघर्ष समितिं छगू विज्ञप्ति पिथनाः गुथि आन्दोलनया दच्छि पूवंसां राज्य पक्षं थःपिनिगु माग पूवंकेत अझ गम्भीर मजूगु द्वपं बिउगु दु । समितिया नायः डा. महेशमान श्रेष्ठं छगू पिथनादीगु विज्ञप्तिइ सरकारं गुथि विधेयकया मस्यौदा यायेगु झ्वलय् सरोकारवाला नाप सहलह यानामच्वंगु धासें गनं सरकारं षड्यन्त्रपूर्वक विधयेक क्वचायेकेगु ज्या जकं जुयाच्वंगु मखुला धकाः शंका प्वंकादीगु दु । नापं सरकारयात अज्याःगु ज्या मयायेत खबरदारी यासें सकल नेवाःत सतर्क, सचेत व संगठित जुयाच्वनेमाःगु आवश्यकता दुगु खँ धयादीगु दु ।

अथेहे फिब्वः ख्यलय् राष्ट्रिय पहिचान संयुक्त संघर्ष समितिं दीप प्रज्वलन नापं गुथि आन्दोलनया किपा ब्वज्या याःगु दु । बिहीवाः सनिलय् उगु दीप प्रज्वलन याःगु खः । नापं स्वनिगःया त्वाःत्वलय् व चुकय् नं गुथि आन्दोलनयात लुमंकाः दीप प्रज्वलन याःगु खः ।

थ्वहे झ्वलय् गुथि विधेयक मंकाः संघर्ष समितिं बिहीवाः भर्चुअल सभा यात । समितिया नायः डा. महेशमान श्रेष्ठया सभापतित्वय् जूगु ज्याझ्वलय् संविधानविद् पूर्णमान शाक्व व नेवाः न्ह्यलुवाः मल्ल के. सुन्दरं विधेकयात कयाः न्ववानादीगु खः ।

सम्बन्धित बुखँ

LEAVE YOUR COMMENTS