कोरोना आशंका जूपिं चिनियाँ निम्ह तिपू पोखरां बेपत्ता
येँ – वंगु वालय् पोखराय् कोरोना भाइरस संक्रमण जूपिं धकाः अनुमान याःपिं निम्ह चिनियाँ नागरिक सम्पर्कविहीन जूगु दु । उमित जुयाच्वंगु फ्लुया लक्षण व उमिगु धापूयात आधार दयेकाः पोखरा लेकसाइडय् च्वंगु स्वाकन इन्टरनेशनल हस्पिटलया डा. दीपेन्द्र थापां विरामीया सम्बन्धय् चीनय् च्वंपिं डाक्टरलिसे सहलह यानाःलि उमित कोरोना भाइरस जूगु आशंका सहित मणिपाल शिक्षण अस्पतालय् रिफर याःगु खः । तर मणिपाल अस्पतालं उकिया बारे माःगु तथ्यांक मबीवं उपिं गन व गज्याःगु हालतय् दु धइगु सी मदुगु खः ।
उगु विषयसं सञ्चार माध्यमं समाचार च्वयेवं विश्व स्वास्थ्य संगठनं नं चिउताः प्वंकूगु दु । समाचारयात कयाः विश्व स्वास्थ्य संगठनं गण्डकी प्रदेशय् उकिया जानकारी कायेत स्वःगु खःसां ल्वगितय् बारे धाःसा छुं सीके फुगु मदुनि । प्रदेश सरकारं समाचार वयेधुंकाः थःपिंसं उमित माःगु खःसां नं सिजनल फ्लु जक खः धकाः लिसः वःगु खँ धाःगु दु ।
पटकपटक ताकेता व फलोअप यायेधुंकाः नं मणिपाल अस्पतालं कोरोना भाइरसया पीडितया बारे छुं जानकारी मबिउगु खँ विश्व स्वास्थ्य संगठनया प्रतिनिधिं धाःगु दु ।
नेपाः सरकारया प्रतिनिधितय्सं स्वाकन इन्टरनेशनल हस्पिटलया तथ्यांकया आधारय् चिनियाँ नागरिकया पासपोर्टया फोटाकपी विश्व स्वास्थ्य संगठनय् छ्वयेधुंकूगु दु । नेपाःया अस्पतालं थःगु अस्पतालय् वःगु महामारी सम्बन्धय् जानकारी बीमाःगु खःसां मणिपालं कलेजं उकिया बारे जानकारी मबिउगु खँ धाःगु दु । गण्डकी प्रदेश स्वास्थ्य निर्देशनालयया जनस्वास्थ्य अधिकृत बाबुराम आचार्यया कथं मणिपालं उकिया बारे जानकारी मबिउ खः ।
छुं नं ल्वय् महामारीया रुप कायेधुंकाः उकिया बारे सरकारयात जानकारी बीगु फुक्कं अस्पतालया कर्तव्य खः । मणिपाल कलेजया लापर्वाहीया कारणं शंका यानातःपिं चिनियाँ नागरिक आः गन दु धइगु खँ तकं सीके मफुगु खँ प्रहरीं धाःगु दु । प्रहरीं उमिगु मोबाइल तकं ह्याकिङ यानाः मालाच्वंगु दु ।
आशंकित चिनियाँ नागरिकत नेपाः त्वःताः वनेधुंकूगु खः वा थन हे दु धइगु बारे अध्यागमन विभाग लिसे सहकार्य यानाः मालेगु ज्या जुयाच्वंगु खँ प्रहरीं धाःगु दु । मेखे उपचारय् संलग्न डाक्टर थापां चिनियाँ नागरिकयाके खनेदुगु फुक्कं लक्षण स्वयेबलय् पूर्ण रुपं टिपिकल कोरोना हे खःसां पूर्ण रिपोर्ट मवःतले कोरोना धाये मजिउगु खँ कनादिल । विरामीयात अस्पतालय् हयाः जाँच यायेधुंकाः उमिसं चीनय् च्वंपिं थः डाक्टरयात फोन यानाः सल्लाह याःगु खःसा नेपाःया डाक्टरं उमित अस्पतालय् भर्ना यायेमाःगु खँ धाःगु दु । उपिं चीनया वुहान प्रान्तं वंगु स्ववाः न्ह्यः जक नेपाः वःगु खँ धाःगु दु ।
LEAVE YOUR COMMENTS