सहकारीया कारोबारय् सचेत जुइत इनाप

येँ(नेपालभाषा टाइम्स)- राष्ट्रिय सहकारी महासंघं सहकारीया कारोबारय् सतर्क, संयमित व सचेत जुइत इनाप याःगु दु । महासंघं गुंगू बुँदाया छगू अपिल जारी यासें उकथं इनाप याःगु खः ।

स्वनिगलय् संचालन जुयाच्वंगु सहकारी संस्थात छगू लिपा मेगु बिसिउँ वनेगु व आर्थिक संकटय् लानाच्वंगु धासें उकथं संयमित, सतर्क व सचेत जुइत इनाप याःगु खः । महासंघं जारी याःगु अपिलय् कोरोना महामारी, रुस युक्रेन युद्धलिसें वस्तु व सेवाय् जूगु मूल्यवृद्धि, मुद्रास्फितिया लिच्वः नेपाःया वित्तीय क्षेत्रय् नं लानाचवंगु व उकिं यानाः लगानी योग्य ध्यबाया अभाव जुयाच्वंगु खँ धाःगु दु ।

थुकथंया लिच्वःया कारणं गुलिखे सहकारी संस्थाय् तरलताया चाप अप्वया वनाः सदस्यतय्त बचत यायेत तकं थाकुयाच्वंगु धइगु तथ्य सार्वजनिक जुयाच्वंगु इलय् जोखिम दुगु क्षेत्रय् लगानी मयायेत, कर्जा सुरक्षणया व्यवस्थापन यायेत, सहकारीया मूल्य व मान्यताकथं कारोबार संचालन यायेत, सहकारी बैंकलिसें केन्द्र व प्रदेश व जिल्लास्तरया संघय् नियमित रुपं सम्पर्क व समन्वय यायेत व आवश्यक सहजीकरण यायेत नं इनाप याःगु दु ।

अथे हे सहकारीया दुजःपिंसं अस्वाभाजिक व्याजया लोभय् तमक्यँसे संस्थागत क्षमता, सुशासनय् संचालन जुयाच्वंगु संस्थाय् जक कारोबार यायेत नं इनाप याःगु दु ।