छगू हे माओवादीया स्वंगू धार
विप्लव माओवादीयात राज्यया प्रतिबन्ध
येँ – नेत्रविक्रम चन्द ‘विप्लव’ या नेपाल कम्युनिष्ट पार्टीया गतिविधियात प्रतिबन्ध तयेगु धकाः सरकारं याःगु निर्णयया विरुद्ध छखे स्वयं विप्लवया पार्टीं कडा प्रतिवाद यायेगु घोषणा याःगु दुसा मेखे मेपिं वामपन्थी पार्टीतय्सं आलोचना नं याना हःगु दु । खास यानाः न्हापा विप्लवलिसे हे दुम्ह मेम्ह माओवादी नेता मोहन वैद्य ‘किरणं’ विप्लवया पार्टीयात प्रतिबन्ध तयेगु सरकारया निर्णय फासीवादी पलाः खः धयादीगु दु ।
वय्कलं सञ्चार माध्यमतलिसे खँ ल्हासें वर्तमान सरकार थः हे जनयुद्धया बलय् टिके जुयाः सत्तारुढ जूगु खः, तर वं हे मेगु जनयुद्ध यानाच्वंगु पार्टीया ज्याखँयात आपराधिक धायेगु पाय्छि मजूगु तर्क तयादीगु दु । सरकार थः हे जनयुद्धया बलं गठन जूगु जुयाः थ्वं मेगु जनयुद्ध याइगु पार्टीयात आपराधिक ज्याखँ धाल धाःसा थ्व फासीवादी पलाः जुइगु खँ नं कनादीगु दु ।
विप्लवया ज्याखँयात आपराधिक गतिविधि घोषणा यासें वयागु ज्याखँयात प्रतिबन्ध तयेगु प्रस्ताव मन्त्रिपरिषद्या बैठकय् प्रस्तुत यानादीम्ह गृहमन्त्री रामबहादुर थापा ‘बादल’ खः । लुमंकेबहः जू, गृहमन्त्री थापा, नेता मोहन वैद्य व विद्रोही नेत्रविक्रम चन्द विप्लव स्वम्हं माओवादी पार्टीया पूर्व नेतात खः ।
मोहन वैद्यं माओवादी विभाजन याःबलय् थापा व चन्द निम्हं उकी दुगु खः । लिपा चन्दं वैद्ययात त्वःताः मेगु पार्टी गठन याः वनसा थापा नं वैद्ययात त्वःताः हानं पुलांगु हे माओवादीइ लिहां वयादिल । न्हापा हे छगू हे पार्टीइ दुपिं खःसां आः वयाः राज्य पक्ष व विद्रोही पक्षया रूपय् मुख्य द्वन्द्व नं वय्कःपिनि दथुइ हे शुरु जूगु दु ।
प्रतिबन्ध तयेगु सरकारया थ्व निर्णययात धाःसा सत्तारुढ दल नेकपाया हे वरिष्ठ नेता माधव नेपालं नं अपरिपक्व निर्णय धयादीगु दु । म्हिगः पत्रकारतलिसे खँ ल्हायेगु झ्वलय् वय्कलं पार्टी दुने सहलह तकं मयासे निर्णय यायेगु कार्यशैली पाय्छि मजू धासें राष्ट्रिय महत्वया पलाः ल्ह्वःने न्ह्यः पार्टीया बैठक सःतेमाःगु व बैठकय् सहलह जुइमाःगु बिचाः नं प्वंकादिल ।
अथे हे नेकपाया हे मेम्ह नेता देवेन्द्र पौडेलं नं विप्लवयात तःगु प्रतिबन्ध हथासं लगे याःगु टिप्पणी यानादीगु दु । वार्ताया निंतिं कुतः यानाः नं मजिल धाःसा जक थज्याःगु पलाः ल्ह्वनेमाःगु खँ धासें वय्कलं विप्लव पुचःयात आः तक नं विद्रोही पुचः कथं मकयागु व विप्लव पुचलं नं थःपिनिगु खँ संयमतापूर्वक तयेमाःगु बिचाः प्वंकादिल ।
उखे विप्लव पुचलं धाःसा थ्व घोषणा यानाः सरकारं थःपिं विरुद्ध युद्धया घोषणा याःगुलिं आः उकिया सशक्त प्रतिवाद यायेगु जुइ धकाः ख्याच्वः बिउगु दु । सरकारया निर्णययात थःपिंसं युद्ध घोषणाया रुपय् कयागु धासें आः सशत्तः प्रतिवाद यायेगु ख्याच्वः पार्टीया पालिटब्युरो दुजः ओमप्रकाश पुनं बियादीगु दु ।
वय्कलं विखण्डनकारी सीके राउतयात घय्पुइगु तर थःपिंत धाःसा दमन यायेगु नीति नालाच्वंगु दु धासें थःपिंत गन खन अन हे सिधयेकि धकाः आदेश बियातःम्ह थ्व सरकारयात नं थःपिंसं याकनं लिसः बीगु खँ कनादीगु दु ।
उखे प्रमुख प्रतिपक्षी नेता लिसें नेपाली कांग्रेसया सभापति शेरबहादुर देउवां धाःसा विप्लवया पार्टी गतिविधियात प्रतिबन्ध तयेगु सरकारया घोषणायात लसकुस यानादीगु दु । लुमंकेबहः जू, देउवां थः प्रम जूगु इलय् न्हापा पुष्पकमल दाहालपिनि छ्यंया मूल्य तोके यानादीगु खः ।
LEAVE YOUR COMMENTS