बालगोपालेश्वर थुगुसी किजापुजां नं मचालीगु
दँय्दसं किजापुजाया न्हिकुन्हु छन्हु हे जक चालीगु रानीपुखूया दथुइ च्वंगु बालगोपालेश्वर देगः थुगु दँय् नं मचालीगु जूगु दु । २०७२ साल बैशाख १२ गतेया गोरखाया बारपाक केन्द्र विन्दु जुयाः ब्वःगु भुखाचं पूर्णरुपं क्षति जूगु रानीपुखू व पुखूया दथुइ च्वंगु बालगोपालेश्वर देगः पुनःनिर्माणय् जुयाच्वंगु ढिलासुस्तीं यानाः थुगुसी स्वन्तिया किजापुजाय् नं बालगोपालेश्वर देगः मचालीगु जूगु खः ।
भुखाय् ब्वःगु हे दँया माघ २ गते भुखाय् दिवसया न्हिकुन्हु लाकाः राष्ट्रपति विद्यादेवी भण्डारीं भुखाचं क्षति याःगु सम्पदा पुनःनिर्माणया शुरुवात रानीपुखुलिं हे यानादीगु खः । वि.सं. २०७३ सालया किजापुजाय् हे देगः खुल्ला यायेगु उद्देश्यं निर्माण यायेत्यंगु उगु देगः प्यदँ दयेधुंकाः नं निर्माण सम्पन्न जुइ फयाच्वंगु मदु ।
बालगोपालेश्वर देगः, देगःतक वनेगु ताँ व पुखूया जःखः क्यब निर्माण यायेगु ठेक्का सम्झौताय् हे ढिलासुस्ती जूगुलिं देगः थुगुसी स्वन्तिया निंतिं चायेके मफुगु सरोकारवालातय्सं धाःगु दु । बालगोपालेश्वर देगः जक जूसां नं स्वन्ति न्ह्यः चायेकेगु राष्ट्रिय पुनःनिर्माण प्राधिकरणं तयारी याःगु खःसां नं देगः व ताँया ज्या अझं ४० प्रतिशतं मल्याक ल्यं दनि ।
किजापुजाया न्हिकुन्हु देगःया पश्चिम लुखाय् बालगोपालेश्वरया मूर्ति तयारु पुजा यायेगु तयारी जूृगु प्राधिकरणया सम्पदा विज्ञ राजुमान मानन्धरं धयादी । ‘रानीपुखू व बालगोपालेश्वर देगःया पुनःनिर्माण सम्पन्न यानाः थुगुसी स्वन्तिया इलय् खुल्ला यायेगु तयारी यानाच्वनागु खः जिमिसं, तर पुनःनिर्माणया ठेक्का सम्झौता लिबाः वंगुलिं सम्भव मजुल’ वय्कलं धयादी, ‘देगःतक वनेगु ताँया दथुइ हे मूर्ति तयाः नं सिन्हः तीत वइपिं भक्तजनतय्त सहज यायेगु कुतलय् जिपिं वनाच्वनागु दु ।’
आतक देगः जःखः सुचुकुचु व देगः पुनःनिर्माणया निंतिं आवश्यक जुइगु सिँ निर्माण यायेगु ज्या जुयाूच्वंगु दु । पिनें स्वयेबलय् खने दयेक ज्या मजूसां नं पुनःनिर्माणया निंतिं आवश्यक दक्वं सामग्री निर्माण यायेगु ज्या धाःसा जुयाच्वंगु दु ।
देगः पुलांगु हे ग्रन्थकुट÷शिखर शैलीइ पुनःनिर्माण यायेत वंगु असार २४ गते राष्ट्रिय पुनःनिर्माण प्राधिकरणं ठेक्का सम्झौता याःगु खः । सम्झौता जूगु दिंनिसें झिलाया दुने निर्माण सम्पन्न यायेकथं प्राधिकरणं निर्माण कम्पनी सिए व तुलसी कन्स्ट्रक्सन जेभीलिसे सम्झौता याःगु खः ।
‘जिमिसं ठेक्का सम्झातौ बिबिउँ हे लिबात । निलाया अवधिइ आपालं ज्या जूगु दु’, प्राधिकरणया सम्पदा विज्ञ मानन्धरं धयादी, ‘ज्या मजू धकाः निर्माण कम्पनीलिसे गुनासो यायेगु थाय् नं मदु ।’ शुरुवाती चरणय् पुरातत्व विभागं देगः पुनःनिर्माणया निंतिं जक छगू करोड पीगू लाखय् ठेक्का सम्झौता याःगु खः । उगु सम्झौताय् देगःतक वनेगु ताँ मदुगु खः ।
हाल प्राधिकरणं देगः निर्माणया निंतिं झिंप्यंगू करोड नीन्हय्द्वः ५५७ तकाय् ठेक्का सम्झौता याःगु दु । रानीपुखू पुनःनिर्माणया निंतिं प्राधिकरणं उपभोक्ता समितिमार्फत गुंगू करोड ९७ गू लाख बजेट विनियोजन याःगु दु ।
पुखू व देगः पुनःनिर्माणया निंतिं प्राधिकरणं नीन्यागू करोड बजेट विनियोजन याःगु दु । चन्द्र शम्शेरया पालय् पुनःनिर्माण याःबलय् गुम्बज शैलीइ निर्माण याःगु देगः थुनाः पुलांगु हे शैलीइ निर्माण यायेत्यंगु दु । देगः जाः ५३ फिटया जुइ ।
LEAVE YOUR COMMENTS