गरिब देय्यात खोप थइ मखुनि
येँ- कोरोना भाइरसया खोप तयार जुल धाःसां नं संसारया गरिब देशय् उगु खोप थ्यनेत हे ताः ई काइगु खँ सीदुगु दु । संसारया थीथी धनी देय्तय्सं अप्वः मात्राय् खोप न्यायेगु सम्झौता याना हयेवं गरिब देय्तय्त खोप मथइगु सम्भावना वःगु खँ धाःगु दु ।
थौंकन्हय् खोप दयेकाच्वंगु कम्पनीतलिसे झिंप्यंगू धनी देय्तय्सं यक्व मात्राय् खोप न्यायेगु सम्झौता यायेधुंकूगु खँ पिहां वःगु दु । यदि
खोप कम्पनीतय्सं आः जूगु सम्झौता कथं उमित नं न्हापां खोप बीगु ज्या यात धाःसा गरिब देय्या भागय् तसकं लिबाक जक खोप थ्यनीगु जुइ ।
आः तक विकास जूगु खोप मध्ये १४ प्रतिशत जनसंख्या दुगु देशं ५३ प्रतिशत डोज न्यायेधुंकूगुलिं गरिब देय्यात तत्काल खोप उपलब्ध जुइ मफइगु खँ धाःगु दु । जर्मनी कम्पनी बायोटेकं अमेरिकी वासः कम्पनी फाइजर कम्पनीलिसे सहकार्य यानाः विकास याःगु खोप व मोडर्ना कम्पनीं तयार याःगु खोप तःमि देय्तय्सं न्यायेगु सम्झौता जुइधुंकूगु दु ।
मोडर्नां उत्पादन याइगु शतप्रतिशत व फाइजरं उत्पादन याइगु ९६ प्रतिशत डोज तःमि देय्तय्सं न्यायेगु सम्झौता जुइधुंकूगु दु । उकिं उमिगु खोप गरिब देय्तय्गु भागय् यक्व लिपा जक लाः वइगु अनुमान जुयाच्वंगु दु ।
अथे हे खोप तयार जूसां नं गुलिखें देशय् धाःसा उकिया वितरण सहज मजुइगु खँ नं धाःगु दु । विशेष यानाः गरिब देशय् उगु खोप भण्डारण यायेत माःगु उपकरण हे मदुगुलिं अन वितरणय् समस्या जुइगु आशंका याना हःगु दु । विश्व स्वास्थ्य संगठनं धाःसा विश्वया फुक्कं जनतायात ध्यानय् तयाः खोप वितरण यायेमाःगु खँय् बः बियाच्वंगु दु ।
उत्पादन जुक्व खोप धनी देय्तय्सं न्याना यंकल धाःसा गरिब देय्या जनता खोपं बञ्चित जुइगु खँय् नं स्वास्थ्य संगठनं चिउताः प्वंकाच्वंगु दु ।
विश्वया थीथी कम्पनीतय्सं उत्पादन याइगु खोप फुक्क न्हापांगु लटय् हरेक देशय् कुल जनसंख्याया २० प्रतिशतयात थयेक वितरण यायेगु योजना विश्व स्वास्थ्य संगठनं दयेकूगु खः । उकिया लागिं छगू समन्वय समिति समेत दयेकातःगु दु ।
नेपालय् नं खोप हःसां नं भण्डारण यायेगु थाय्या समस्या जुइ फइफु धाःगु दु । उगु खोप भण्डारण यायेत माइनस ७० डिग्री ख्वाउँगु व्यवस्था यायेमाः । नेपालं आः तक अज्याःगु भण्डारणया व्यवस्था तकं याःगु मदुनि । कोरोनाया खोप वल धाःसा उकिया भण्डारण व वितरण व्यवस्था यायेगु लागिं ने-लं छगू समिति गठन यानाः ज्या न्ह्याके बीधुंकूगु दु । समितिपाखें खोप हयेगु व भण्डार यायेगु बारे ज्या नं न्ह्याकेधुंकूगु दु ।
LEAVE YOUR COMMENTS