विद्युत व्यापारय् एमिकस क्युरी झिके यात

येँ (नेपालभाषा टाइम्स)-नेपाः व भारत दथुइ जूगु दीर्घकालीन विद्युत व्यापार सम्झौता विरुद्ध लाःगु रिटय् एमिकस क्युरी झिके यायेत सर्वोच्च अदालतं आदेश बिउगु दु ।

रिट निवेदनयात कयाः प्रारम्भिक सुनुवाइ लिपा न्यायाधीश नहकुल सुवेदीया इजलासं नेपाल बार एसोसिएसन व सर्वोच्च अदालत बार एसोसिएसनपाखें छम्ह छम्ह अदालतया ग्वाहालिमि (एमिकस क्युरी) झिके यायेत आदेश बिउगु खः ।

सर्वोच्चं झिंन्यान्हुया दुने दीर्घकालीन विद्युत व्यापार सम्झौता बारे लिखित लिसः पेश यायेत सरकारया नामय् आदेश जारी याःगु खः । अदालतं सम्झौता सम्बन्धी सक्कल भ्वं सहित उपस्थित जुइगु आदेश बिउगु खः ।

सर्वोच्च अदालतं थुगु विवाद बारे निगुलिं पक्षयात सहलह यायेत माघ २३ गते पेशी क्वःछिउगु दु । वकुन्हु मुद्दायात कयाः अन्तरिम आदेश जारी यायेगु कि मयायेगु धइगु बारे सहलह जुइ ।

वंगु पुस १९ गते नेपाः व भारत दथुइ दीर्घकालीन विद्युत व्यापार सम्झौता जूगु खः । उगु सम्झौता विद्युत व्यापार जक मखुसें जलविद्युत उत्पादन व विद्युत प्रसारण पूर्वाधारय् लगानी यायेगु विषय स्वाःगु धासें रिट निवेदनय् न्ह्यसः थनातःगु दु ।

सर्वोच्च अदालतं विद्युत व्यापार सम्झौताय् सन्धि खः कि मखु धइगु न्ह्यसः थनातःगु दु । संविधानया धारा २७९ स नेपाल सरकार पक्ष जुइगु निश्चित प्रकृतिया सन्धि व सम्झौता संघीय संसदं अनुमोदन यायेमाःगु व्यवस्था दु ।