ससफोया शिल्पी विशेष प्रदेश उपसमिति
यल – संघीय समाजवादी फोरम, नेपाल शिल्पी विशेष प्रदेश समितिया ग्वसालय् ३ नं. प्रदेश विशेष शिल्पी भेला जुल । पार्टीया केन्द्रीय ज्याकू यल बालकुमारीइ जूगु भेलाय् मूपाहांकथं पार्टी सहअध्यक्ष राजेन्द्र श्रेष्ठ झायादीगु खः ।
ज्याझ्वलय् नवासें मूपाहां श्रेष्ठं सरकारं आः नकतिनि सीके राउतलिसे याःगु ११ गू बुँदाया सम्झौता अमूर्त जूगु धासें उकिं मधेशया क्रिमियाया लँपुइ यंके फुगु ख्याच्वः बियादिल । वय्कलं ११ गू बुँदाया सम्झौताय् नेपाल स्वतन्त्र, स्वाधिन, सार्वभौमसत्ता सम्पन्न, अविभाज्य व अखण्ड तकाः तयेगु लसकुस यायेबह जूसां नं स्वतन्त्र मधेशया खँ नं जनअभिमतया लिधसाय् लोकतान्त्रिक विधिपाखें समाधान मालेगु धइगु अमूर्त जूगु धयादिल ।
सरकार व राउत दथुइ जूगु सम्झौता राष्ट्रघातया साधन नं जुइ फइगु आशंका यासें वय्कलं क्रिमिया कुचा दःगु घटनाया दृष्टान्त बियादिल । लिसें वय्कलं रेशम चौधरीयात आजीवन कारावास बीगु राज्यया नश्लवादी चरित्रया दसू जूगु व विप्लप समूहया नेकपालिसे वार्ताया माध्यमं समस्याया समाधान मालेत पहल यायेमाः धयादिल ।
उगु इलय वय्कलं शिल्पीतय्गु सम्मानजनक पहिचानया निंतिं थःगु पार्टीं खँ जक मल्हासे व्यवहारय् नं शिल्पी प्रदेश दयेकाः उदाहरणीय ज्या याःगु दु धयादिल । पार्टी उपमहासचिव दानबहादुर विश्वकर्मा, ३ नं. प्रदेशया पार्टी अध्यक्ष लालबहादुर तामांग, मुख्य सचिव तारा विश्वकर्मां नं नुगःखँ प्वंकादीगु भेलां शरण रसाइलीया अध्यक्षताय् झिंखुम्हेसिया शिल्पी विशेष प्रदेश ३ नं. प्रदेश उपसमिति नं गठन याःगु खः ।
LEAVE YOUR COMMENTS