अर्बौं दँ पुलांगु हाकुगु हिरा लिलामी जुइगु
एजेन्सी÷ अर्बौ दँ पुलांगु धयातःगु हिरा लिलामी जुइगु जूगु दु । द एनिग्मा नांया थ्व हिरायात पृथ्वी लूगु दकलय् तग्वःगु चानातःगु हिरा नं धयातःगु दु ।
‘हाकुगु हिरा’ धकाः नं धाइगु थ्व हिरा अर्बौं दँ न्ह्यः बने जूगु धयातःगु दु । थ्व हिराया उत्पत्तियात कयाः थीथी मान्यता नं दया वयाच्वंगु दु । थुपिं मध्ये छगू थ्व हिरा अन्तरिक्षं पृथ्वी वःगु खः धयागु नं खः ।
थ्व हिरा ५५५.५५ क्यारेटया खः, गुगु तसकं अस्वाभाविक खः । छपु केरा बराबरया तौल दुगु थ्व हिराया लिलामीं ६० लाख डलर स्वयां अप्वः ध्यबा वइगु अनुमान यानातःगु दु । थुकियात तिसा व कला ज्वलंया तःधंगु विक्रेता सथवीं लन्दनय् लिलाम यायेत्यंगु खः । हिराया लिलामी अनलाइन माध्यमं जुइ ।
थ्व हिरा कार्बनेडो अर्थात प्राकृतिक हिराया दकलय् कडा स्वरुपमध्ये छगू खः । कार्बनेडा तसकं दुर्लभ जुइ । आःतक ब्राजिल व मध्य अफ्रिकी देशय् जक थ्व लूगु दु । थुकी उल्कापात जुइबलय् जक दइगु ओस्बर्नाइट नांया छगू कथंया खनिज दइ । उकि थ्व हिरायात अन्तरिक्षय् उत्पन्न जूगु विश्वास यानातःगु खः । तर थ्वया उत्पत्ति गन जूगु धयागु धाःसा आःतकं रहस्य हे जुयाच्वंगु दनि ।
हाकुगु हिरा सामान्यतयाः थ्यंमथ्यं २.४ निसें ३.२ अर्ब वर्ष वा डाइनसोरया अस्तित्व दुगु ई स्वयां पुलांगु जुइ । झी च्वंच्वनागु पृथ्वी थ्यंमथ्यं ४.६५ अर्ब दँ न्ह्यः उत्पन्न जूगु खः । थ्व ल्याखं पृथ्वीया आयुलिसे थ्व हिराया आयुया तुलना याना वयाच्वंगु दु ।
लस एञ्जल्सया प्राकृतिक इतिहास संग्रहालयया भूवैज्ञानिक आरोन सेलेस्टिअनया कथं कार्बनेडो पृथ्वीया आन्तरिक ब्वया गहिराइलय् दयेफु, गुगु हिरा लुइगु थाय् स्वयां तसकं क्वय् जुइ ।
सथवीं थ्व हिरा लिलामयात ‘मानव जातिं आःतक सिउगु दकलय् पुलांगु, अर्बौं दँ पुलांगु आश्चार्य मध्य् छगू थःगु ल्हातय् लाकेगु अवसर’ धकाः व्याख्या यानातःगु दु । थ्याक्क ५५५.५५ क्यारेट दुगु थ्व हिरायात न्यय्न्याखेरं हे चानातःगु दु ।
LEAVE YOUR COMMENTS